da sora Armina Maissen
Per l’emprema gada lai Jesus festivar sesez sco retg. Denton, buca sco in retg imperial, buca sco in retg, al qual subdits ein suttamess, e buca perquei ch’el enquera favur giubilonta dil pievel. Na, Jesus ei daventaus victur e retg totalmein sur da sesez, sur dallas tentaziuns e fleivlezias, las qualas el haveva priu sco carstgaun sin el, sco ei stat en la brev als fideivels da Filippi:
«Schegie ch’el fuva ella veta da Diu, ha el … spogliau sesez, ha acceptau la veta da sclav ed ei daventaus eguals als carstgauns» (mira Fil 2,6–11).
Ussa sa nuot pli tener anavos el. Ussa regia mo sia carezia. El festivescha sia victoria ed arva siu reginavel da carezia per tuts. In mument magnific! Il pievel senta quei. Quel astga guder in mumenet l’atmosfera dil reginavel da Diu, che Jesus arva entras sia mort e levada paucs dis suenter. Perquei reagescha il pievel aschi giubilont, senza esser pertscharts da quei ch’el fa. Era nus astgein selegrar oz, pertgei en quei reginavel astgein era nus entrar in di.
Mt 21,1–11
1S’avischinond a Jerusalem, ein els arrivai a Betfage, damaneivel dil Cuolm dallas ulivas. Cheu ha Jesus tarmess ordavon dus da ses giuvnals, schend ad els: 2Mei el vitg davon vus, e beingleiti vegnis vus ad anflar in’asna rentada e siu pulein sper ella. Disrentei ella e menei els tier mei. 3E sch’ins di a vus enzatgei, schei: Il Segner drova els. Mo el turnenta els immediat. 4Quei ei daventau per ch’ils plaids dil profet secumpleinien:
5Schei alla feglia da Sion:
Uarda, tiu retg vegn tier tei;
migeivels, sesend sin in’asna
e sin in pulein, il pign d’in animal da sauma.
6Ils giuvnals ein i ed han fatg sco Jesus veva cumandau ad els. 7Els han menau neutier l’asna ed il pulein. Lu han ei mess lur mantials sin quels, e Jesus ei sesius sissu. 8Ed ina gronda part dil pievel rasava sia vestgadira sin via, auters tagliavan frastgas giud las plontas e sternevan sin via. 9Las roschas che mavan ordavon ad el e quellas che suandavan grevan: Hosanna al fegl da David! Benedius sei quel che vegn el num dil Segner! Hosanna ellas altezias! 10Cura ch’el ei entraus a Jerusalem, ei igl entir marcau vegnius en moviment ed ha emparau: Tgeinin ei quei? 11E las roschas han detg: Quei ei il profet Jesus, da Nazaret en Galilea.
