da sur Marcus Flury
Nus enconuschein per ordinari igl eveniment da Tschuncheismas sco Lucas raquenta el els Fatgs dils apostels cul suffel vehement e las lieungas da fiug che setschentan sils apostels. Tier igl evangelist Gion stat la vegnida dil sogn Spert en stretg connex cun Pastgas e sco eveniment ch’ei schabegiaus il di dalla levada. Il salid pascal secloma «schalom», q.v.d. pasch. Schalom ei dapli che mo vegnir perina. Schalom munta veta el vast senn dil plaid, ed il garant da quella veta ei il Spert sogn ch’ils apostels retscheivan da Jesus. El flada sin els, dat pia ad els da siu flad, da sia veta. Quei Spert unescha ils giuvnals cul Cristus pascal ed in cun l’auter. En quei Spert san els cuntinuar la missiun dil Cristus glorificau. Quei Spert liberescha e scaffescha entras perdunament in mund renovau che viva el schalom. Tras Batten e Creisma vein era nus retschiert quei Spert per che nus saveien sestentar per il schalom.
Gn 20,19-23
19La sera digl emprem di dalla jamna, cura ch’ils giuvnals eran radunai per tema dils Gedius davos escha serrada, ei Jesus vegnius, ei staus en lur miez ed ha detg ad els: Pasch cun vus! 20Suenter quei salid ha el mussau ad els ses mauns e sia costa. Vesend il Segner, ein ses giuvnals selegrai. 21Jesus ha turnau a dir ad els: Pasch cun vus! Sco il Bab ha tarmess mei, aschia tarmettel jeu vus. 22Suenter quels plaids ha el fladau sin els e detg: Retschevei il Spert sogn. 23A quels che vus relascheis ils puccaus, ein els relaschai; a quels che vus retenis els, ein els reteni.
