da Marcel Köhle
«Buca tema» u «buca temei!» ei ina exclamaziun che nus udin adina puspei ella sontga Scartira. Ella stat era en stretg connex culla veta da Jesus: In aunghel annunzia cun quels plaids la naschientscha a Maria ed alla fossa vita annunzia in aunghel aschia la levada da Niessegner.
«Buca temei!» – Quella exclamaziun udin nus oz treis gadas egl evangeli, el qual Jesus plaida tier ses giuvnals. Jesus tarmetta els cun sia nuviala ora el mund, mo el sa era ch’ei vegn a dar problems e ch’ils giuvnals vegnan a sentir l’opposiziun da certs carstgauns. Malgrad la resistenza ch’ei sa dar, duein els buca piarder la curascha. Els duein saver, Dieus ei cun els sin via ed els ein sut sia protecziun.
Quella nuviala vala era per nus! – «Buca temei!», nus essan en ses mauns, Dieus protegia nus ed ei cun nus en mintga mument da nossa veta.
Mt 10,26–33
26Mo buca temei els! Pertgei nuot ei zuppau che vegn buca scuvretg, nuot ei tschelau che vegn buc enconuschent. 27Quei che jeu ditgel a vus el stgir, annunziei ella glisch, e quei che vus udis ella ureglia, clamei giu dils tetgs.
28Buca temei quels che mazzan il tgierp, mo san buca mazzar l’olma. Temei plitost quel che sa far ir alla malura olma e tgierp egl uffiern. 29Vend’ins buca dus paslers per in pèr centims? E tuttina croda buc in dad els per tiara, senza che vies Bab sappi. 30Mo quei che pertucca vus: Tut vos cavels ein dumbrai. 31Buca temei pia. Vus valeis dapli che bia paslers.
32Scadin che confessa mei avon ils carstgauns, quel vegn era jeu a confessar avon miu Bab ch’ei en tschiel. 33Mo scadin che snega mei avon ils carstgauns, quel vegn era jeu a snegar avon miu Bab ch’ei en tschiel.
