da Mariano Tschuor
Propaganda pura, quei text. Il Nazaren fa queidas da suandar el. Cun empermischuns ch’ein strusch da verificar. Co vul el levgiar ils staunchels? Cun far amogna ad els da surprender siu giuv? In giuv metteva sut ils bovs che vevan da trer il criec. Buc ual ina metafra che fa tschaffen da suandar Jesus e sias ductrinas.
Autras empermischuns suondan: Migeivladad, humilitonza, levgiament, emperneivladad. Surlunder selai marcadar: Ina veta emperneivla, levgiada da tuttas stentas ed incertezias, libra da quitaus e fastedis, ei ina biala perspectiva. Mo tgi garantescha il success? Jesus da Nazaret forsa, quel che finescha aschi desastrusamein vid la crusch? In buordi lev? In che taglia empermiez tschiel e tiara. Na, bien Jesus, buc tschorventa tiu pievel. Paleisa agradora che la porta ei stretga e la via malguessa, quella da suandar tei. Tia revelaziun san ins buc capir, ni sco sabi e perdert, ni sco pign e grond, ella metta nus en confusiun. Forsa seregordas Ti da Tiu pievel cun turnar e metter en uorden quei che Ti has entschiet.
Mt 11,25–30
25Da quei temps ha Jesus priu il plaid e detg: Jeu laudel tei, Bab, Signur dil tschiel e dalla tiara, che ti has zuppentau quei als sabis e perderts e revelau als pigns. 26Gie, Bab, aschia ha ei plaschiu a ti! 27Tut ei vegniu surdau a mi da miu Bab, e negin enconuscha il Fegl auter ch’il Bab, e negin enconuscha il Bab auter ch’il Fegl ed a tgi ch’il Fegl vul revelar ei.
28Vegni tier mei vus tuts ch’essas staunchels ed engreviai e jeu vi levgiar vus. 29Prendei miu giuv sin vus ed emprendei da mei, pertgei jeu sun migeivels ed humiliteivels da cor e vus vegnis ad anflar levgiament per vossas olmas. 30Pertgei miu giuv ei emperneivels e miu buordi ei levs.
