· 

17. dumengia ordinaria (A)

da ser Jan-Andrea Bernhard

En biaras semeglias discuora Jesus dil reginavel da Diu resp. dil tschiel. Denton sedumandein nus: Tgei ei atgnamein il reginavel da Diu? Tenor la Bibla ei il reginavel da Diu buca cheu ni leu, mobein schabegia en muments tut specials, en muments cu che la nuviala da Diu tarlischa si, en nies mund terrester. Cheu ei in um che anfla in scazi en in èr. E lu vend’el tut sia rauba – tgei ei il motiv? Spir legria sur da sia scuvretga. Cheu schabegia il reginavel da Diu. Leu, nua che carstgauns lain secommuentar da Diu. Quella commuentaziun duei ver consequenzas per nies viver e nies agir.

Jesus Cristus ha scaffiu biars tals muments, denton savein era nus daventar perdetgas da tals muments entras siu plaid. Sche nus tedlein sia sontga scartira, siu plaid da carezia e sia viarva da salvament astgein nus adina puspei passentar muments nua che nus astgein gir: Ussa sentel jeu – sco avongust – enzatgei da quei, co ch’il reginavel da Diu e la veta tier Diu vegn ad esser.

Nus lein arver nos cors e nies patertgar per siu plaid e sia nuviala che porta salit a nossas olmas. «Beaus il carstgaun che ha siu plascher dallas ordras dil Segner. El ei sco in pumer plantaus sper dutgs da schuar che porta fretg a dretg temps» (cf. Ps 1).

Mt 13,44–52

44Cul reginavel da tschiel stat ei aschia: In scazi era zuppaus en in èr. In um ha anflau el e turnau a zuppar el, e dalla legria eis el ius ed ha vendiu tut siu fatg e cumprau quei èr.

45Cul reginavel da tschiel stat ei aschia: In marcadont mava ad encurir bialas pèdras. 46Havend anflau ina pèdra fetg custeivla, eis el ius ed ha vendiu tut siu fatg e cumprau quella pèdra.

47Cul reginavel da tschiel stat ei plinavon aschia: Ina reit ch’ins fiera ella mar rimna da tuttas sorts. 48Cura ch’ella ei pleina, tilan ils pescadurs a riva ella. Lu sesan ei e rimnan il bien en canasters ed il schliet fieran ei naven. 49Aschia vegn ei ad esser alla fin dil mund: Ils aunghels vegnan ad ir e zavrar ils nauschs ordenter ils gests 50per fierer els el fuorn da fiug. Leu vegn ad esser bargir e sgriziar ils dents.

51Veis capiu tut quei? Els rispundan: Gie. 52Ed el di ad els: Perquei ei mintga mussader dalla escha ch’ei daventaus giuvnal dil reginavel da tschiel semeglionts ad in patrun-casa che pren ord siu tresor caussas novas e vedras.

Download
Versiun per stampar
Onn current 17 A.pdf
Adobe Acrobat Dokument 83.2 KB