dad Andri Casanova
Sche nus vegnin confruntai cun la damonda, tgei che seigi il pli impurtont en nossa cardientscha, eis ei nuota aschi sempel d’anflar ils dretgs plaids. Pli fetg ch’ins ponderescha e pli bia ch’ins savess numnar.
Jesus dat ina risposta fetg concisa: Carezar Diu e carezar tiu proxim sco tetez. Sia risposta sebasa sin text ord il Veder Testament. Per l’ina numna el la profunda carezia enviers Diu sco ella ei nudada en in’oraziun ch’ils Gedius fan silmeins duas gadas a gi, il schinumnau «Schma’ Israel» (cf. Dt 6,5). E per l’autra numna el la carezia proximala colligiada cun la carezia enviers sesez sco ella sesanfla amiez il pentateuc, el pli profund intern dalla bibla hebraica (cf. Lev 19,18).
La risposta ei cuorta e concisa, ed era capeivla. Magari po ella era animar d’approfondir l’atgna cardientscha. La carezia enviers Diu duei esser presenta en nies mintgagi semegliont all’oraziun dil «Schma’ Israel». E la carezia enviers il proxim ed enviers sesez duei s’ignivar profondamein en nies pli profund intern.
Mt 22,34–40
34Ils farisès han enderschiu che Jesus veva fatg quescher ils sadducès. Sinquei ein els seradunai. 35Ed in dad els, in mussader dalla lescha, ha dumandau per metter el en embrugl: 36Mussader, tgei camondament ei il pli grond dalla lescha? 37Jesus di ad el: Ti dueis carezar tiu Diu da tut tiu cor, da tut ti’olma e da tut tiu spért. 38Quei ei il pli grond ed emprem camondament. 39Il secund ei semeglionts a quel: Ti dueis carezar tiu proxim sco tetez. 40Vida quels dus camondaments ein fermai lescha e profets.
