dad Ursicin G. G. Derungs-Bartolomei
Eis ei lev ni grev dad esser in cristifideivel? Segir eis ei cumplicau, ni pareva silmeins aschia. Tut quels condaments da Diu e della baselgia. E lu il catechismus cun sias ductrinas abstractas, ils siat sogns sacraments. Tgi sa dumbrar si tut quei?
Ed ussa, tuttenina, cun leger igl evangeli de quella dumengia, para che tut quei emporti la finala pauc ni nuot. Cheu, il giuvenessendi, vegnan sco per incont las «cartas midadas sin meisa», las cartas da giug, dil giug della veta (lu aunc cristiana). Cheu valan tuttenina autras reglas, autras mesiras. Ins vegn buca dumandaus giu sco da ductrina. Mobein: has ti dau da magliar a tgi che veva fom? Has ti vestgiu tgi che veva nuot da securclar? Ed aschia vinavon: las 7 ovras da misericordia!
Esser catolics ni protestants, in gediu ni in muslim, ni in pagaun e buca cartent? Quei ei buc la damonda. Da leu ano, nua ch’ins ha eligiu da star, eis ei d’ademplir il messadi universal de quei evangeli. Igl evangelist Mattiu di da slargiar nossa egliada viers igl «evangeli» che vegn dals auters, d’ordeifer, da tgi ch’ha fom, per exempel. El fa quei gia ella historia dils Sabis digl orient che vegnan d’ordeifer suandond lur steila ed anflan il Salvader, ch’ils «insiders» ston pér encurir en lur Scartiras.
Mt 25,31–46
31Cura ch’il Fegl dil carstgaun vegn en sia maiestad e tut ils aunghels cun el, vegn el a prender plaz sin siu tron da gloria. 32Tut las naziuns vegnan radunadas avon el, ed el vegn a zavrar ils ins dils auters sco il nurser zeivra ils anugls dallas nuorsas. 33El vegn a plazzar las nuorsas da sia vart dretga ed ils anugls da sia vart seniastra. 34Lu vegn il retg a dir a quels da vart dretga: Vegni, vus benedi da miu Bab, prendei en possess il reginavel ch’ei preparaus per vus dapi la fundaziun dil mund. 35Pertgei jeu hai giu fom, e vus veis dau da magliar a mi, jeu hai giu seit, e vus veis dau da beiber a mi; jeu fuvel in jester, e vus veis dau albiert a mi; 36jeu erel nius, e vus veis vestgiu mei, malsauns, e vus veis visitau mei, en perschun, e vus essas vegni tier mei. 37E lu vegnan ils gests a rispunder: Segner, cu vein nus viu tei cun fom e vein dau da magliar a ti, cun seit e vein dau da beiber a ti? 38Cu vein nus viu tei jasters e vein dau albiert a ti, nius e vestgiu tei? 39Cu vein nus viu tei malsauns ni en perschun e vein visitau tei? 40Ed il retg vegn a dar per risposta ad els: En verdad, jeu ditgel a vus: Quei che vus veis fatg ad in dils pli pigns da mes frars, veis vus fatg a mi. – 41Suenter vegn el era a dir a quels da vart seniastra: Mei naven da mei, vus smaledi, el fiug perpeten ch’ei preparaus al giavel ed a ses aunghels. 42Pertgei jeu hai giu fom, e vus veis buca dau da magliar a mi; jeu hai giu seit, e vus veis buca dau da beiber a mi: 43jeu fuvel in jester, e vus veis buca dau albiert a mi, nius, e vus veis buca vestgiu mei, malsauns ed en perschun, e vus veis buca visitau mei. 44Cheu vegnan era quels a dumandar: Segner, cu vein nus viu tei cun fom ni seit, jasters ni nius, malsauns ni en perschun e vein buca gidau tei? 45Lu vegn el a rispunder ad els: En verdad, jeu ditgel a vus: Quei che vus veis buca fatg ad in dils pli pigns da mes frars, veis vus era buca fatg a mi. 46E quels vegnan ad ir ella peina perpetna, ils gests denton ella veta perpetna.
