· 

Fiasta dil batten da Jesus (B)

da ser Jan-Andrea Bernhard

Gest ei la fiasta dils treis sogns retgs festivada, ed igl ei gia la fiasta dil batten da Jesus avon esch e nus sedumandein: Daco ei igl evangeli dad oz il batten da Jesus? … ah, clar: Cuort suenter la naschientscha ston ins battegiar igl affon! Denton … ei gie Jesus vegnius battegiaus pér cun varga 30 onns. Gest igl evangeli dad oz dat avis a nus sin dus treis aspects buca nunimpurtonts en connex cun il batten.

Cheu vegn Jesus numnaus l’emprema ga (el pli vegl evangeli che nus vein) «Ti eis miu Fegl carezau!» – Ha nies bien Diu buca clamau era nus (a caschun dil batten) schend «Ti eis feglia carezada, ti eis fegl carezau?» e fundau ina ligia cun mintgin da nus? E quei independent dil termin dil batten – seigi ei stau cuort suenter naschientscha ni in dus onns pli tard.

Era ils plaids da Gion Battesta gidan vinavon nus, numnadamein che nus restien mudests e seigien buca garmadis: Il Spert sogn schai buca els mauns da Gion Battesta, buca en nos mauns e buca en quels dils superiurs ecclesiastics, mobein els mauns da Deus e Niessegner – entras lez «suffla el, nua ch’el vul» (Gn 3,8).

Mc 1,7–11

7Suenter mei vegn in ch’ei pli pussents che jeu; jeu sun buca vengonzs da sestorscher avon ses peis e snuar las curegias da ses calzers. 8Jeu hai battegiau vus cun aua, mo el vegn a battegiar vus cun il Spert sogn.

9Lezs dis eis ei capitau che Jesus ei vegnius da Nazaret en Galilea ed ei seschaus battegiar da Gion el Jordan. 10E gest cura ch’el ei vegnius ord l’aua, ha el viu co il tschiel ei s’aviarts ed il Spert ei descendius sco ina columba sur dad el; 11ed ina vusch ha tunau giu da tschiel: Ti eis miu Fegl carezau, da tei hai jeu miu cumplascher.

Download
Versiun per stampar
Batten dil Segner B.pdf
Adobe Acrobat Dokument 79.9 KB