da sur Marcus Flury
Quei raquent tschenta damondas. El provochescha. El ei grevs da capir. Tgei maletg da Diu e dil carstgaun vegn cheu mussaus? Per mei indichescha quei raquent in svilup ella relaziun dil carstgaun cun Diu. La cardientscha en Diu sto buca semussar ell’unfrenda dil pli car ch’ins ha. Dieus vul buca la mort, mobein la veta. Che Dieus impedescha Abraham d’unfrir siu affon, muossa con fetg che Dieus stema la veta.
Mirond sin nies temps setschenta en mei la damonda: Co mein nus ozildi entuorn culs affons? Cons affons daventan unfrendas dallas ambiziuns stravagadas dils geniturs e da tenutas egoisticas da carschi sin via? En contas tiaras dat ei aunc lavur d’affons? Cons affons vegnan violai corporalmein e psichicamein? Per nus carstgauns semuossan la carezia per Diu e la cardientscha en el buc en unfrendas da carstgauns, mobein el promover la veta.
Gen 22,1–2.9a.10–13.15–18
Lez dis ha Dieus mess Abraham sill’emprova. El di ad el: Abraham! Quel rispunda: Cheu sun jeu! E Dieus di: Pren Isac, tiu sulet fegl che ti tegns car, va ella cuntrada da Moria e porscha el leu per unfrenda sin in dils cuolms, il qual jeu vi mussar a ti.
Arrivai el liug che Dieus veva indicau, ha Abraham erigiu leu igl altar.
Lu stenda Abraham siu maun e tschaffa il cunti per cannar siu fegl. Mo enaquella cloma igl aunghel dil Segnerdenter igl aunghel dil Segner e Dieus sez vegn savens buca differenziau giu da tschiel: Abraham, Abraham! El rispunda: Cheu sun jeu! Lez cloma: Buca metta maun vid il mat e buca fai dil mal ad el. Pertgei uss sai jeu che ti has tema da Diu: Ti has gie buca snegau da dar tiu sulet fegl a mi. Alzond ses egls ha Abraham viu davos el in anugl che era secavistraus cun ses corns en in spinatsch. El ei ius vitier, ha priu igl anugl ed unfriu quel empei da siu fegl.
Sin quei cloma igl aunghel dil Segner l’autra ga giu da tschiel e di ad Abraham: Jeu engirel a memez – aschia plaida il Segner – perquei che ti has fatg quei ed has buca snegau tiu sulet fegl, vi jeu benedir tei rehamein e far vegnir tia descendenza aschi numerusa sco las steilas al firmament e sco il sablun alla riva dalla mar. E tes descendents duein posseder las portas da lur inimitgs, ed el num da tia schlatta duein tut ils pievels dalla tiara esser benedi, per pagaglia che ti has tedlau mia vusch.
