da sur Alfred Cavelti
Gl’ei evident: Pieder tenor il rapport dils evangelis onz temeletgs, per bien romontsch magari ina buglialatg, sepresenta els Fatgs dils apostels sco annunziader perschuadiu e curaschus digl evangeli dil Cristus. Pastgas ha consequenzas radicalas en sia tenuta e siu esser. El plaida cun fermezia interna avon quels dils quals el veva anteriuramein grond respect e sterment. Pastgas ha schau daventar el in niev carstgaun. Per Pieder ei Cristus, il crucifigau e levaus da mort en veta, quel che dat veta e forza da viver. El ei, sco Pieder annunzia, il crap da cruna che porta e dat tegn e sustegn a tut, quel che fa sauns il malsauns e porta spindrament. Ed el renfatscha all’elita religiusa dils Gedius ch’els han rufidau il Cristus, il spindrader dil mund.
Fatgs 4,8–12
Lez dis ha Pieder, pleins dil Spert sogn, detg: Vus menaders dil pievel e vus vegls! Sche nus vegnin interrogai oz pervia d’ina bun’ovra vid in malsaun, tras tgei quel seigi vegnius medagaus, sche dueis vus tuts ed igl entir pievel d’Israel saver: En num da Jesus Cristus da Nazaret che vus veis crucifigau e che Dieus ha leventau dils morts. Tras el stat quei um sauns avon vus. El ei il crap che vus baghegiaders veis rufidau, mo ch’ei daventaus il crap da crunacrap da cantun ni crap final. E tras buc in auter dat ei spindrament. Pertgei igl ei buca dau als carstgauns in auter num sut il tschiel, tras il qual nus savein anflar spindrament.
