· 

10. dumengia ordinaria – emprema lecziun (B)

da Mariano Tschuor

Havess la historia dalla carstgaunadad giu in’autra viulta, sche buc Eva havess dau il meil ad Adam, mobein Adam ad Eva? Fuss en gliez cass igl um vegnius stigmatisaus dad esser il surmenader, la femna si’unfrenda? Mo essend la historia vegnida scretta, tradida e colportada tenor quels plaids biblics, ha la femna stuiu tener neu sco prototip per tut quei ch’ei «malschuber». Fatal, gie horribel per tut quellas femnas suttamessas alla prepotenza dils umens, dils sistems e dallas autoritads, per tut quellas ch’ein vegnidas e vegnan violadas, tgerlentadas e malduvradas.

Schegie che nus savein che «surmenar» ei in’acziun ni virila ni feminina, mobein ina tala naschida ord in impuls dil nausch e dil mal, ei Eva restada l’autura da quella fixaziun. Quei fatg culminescha en ina canzun mariana che nus cantaven cun ardur duront las devoziuns dil meins da matg: «Ev’en Ave midas». Nossdunna smardeglia cun siu pei il tgau dalla siarp. Il surmenem vegn bandischaus. Vegn la femna rehabilitada cheutras? Cristus il niev Adam – Maria la nova Eva? La historia dalla carstgaunadad muossa – deplorablamein – in’autra realitad.

Gen 3,9–15

Suenter che Adam veva magliau dil pumil fretg dil pumer amiez il curtgin ad Eden, cloma il Segner el e di ad el: Nua eis? Ed el rispunda: Cu jeu hai udiu tia vusch el curtgin, hai jeu temiu, perquei che jeu sun nius; perquei sun jeu sezuppaus. Cheu damonda Dieus: Tgi ha detg a ti che ti seigies nius? Ti has bein buca magliau dil pumer, dil qual jeu vevel scumandau a ti da magliar? Adam replica: La dunna che ti has dau a mi per cumpignia, ha dau a mi da quei pumer; lu hai jeu magliau.

Cheu di Dieus il Segner alla dunna: Pertgei has ti fatg quei? La dunna rispunda: La siarp ha surmenau mei; perquei hai jeu magliau. Ussa di Dieus il Segner alla siarp: Damai che ti has fatg quei, dueis ti esser smaledida denter tut ils animals, dumiastis e selvadis; ti dueis seruschnar sin tiu venter e magliar puorla tut tia veta, e jeu vi far esser inimicezia denter tei e la dunna e denter tiu sem e siu sem; quel vegn a smardigliar tiu tgau, e ti vegns a punschermorder siu calcogn.

Download
Versiun per stampar
Onn current 10 B.pdf
Adobe Acrobat Dokument 75.9 KB

☛ evangeli dalla dumengia: Mc 3,20–35