dad Ursicin G. G. Derungs
La multiplicaziun dils pauns ei in tema recurrent ella Bibla. El ha sia actualitad, mo ei en quella fuorma tuttina jasters per nies temps. Ella liturgia vegn quei tema applicaus all’eucaristia. È questa dumengia, che preveda sco evangeli la multiplicaziun dils pauns tenor Gion 6, ch’introducescha il grond discuors de Jesus entuorn il paun da tschiel. – L’episoda ord la sequenza dellas miraclas dil profet Elias interpretescha è igl evangeli: multplicar pauns, vul dir: dar da magliar cun pauc a biars.
Il profet fa quei, e fa ei sco profezia: il nutriment dil profet arva in avegnir, sco quei che la profezia arva in avegnir. Leutier: il paun ei il Plaid de Diu sez. È quel che serepeta onn per onn ella liturgia, e che vegn evidentamein mai consumaus dil tut, ha adina aunc in surpli da muntadas e da forza, eba las «vanzadiras» che tonschan «per l’entira jamna», insumma per il temps a vegnir. – Quei che nus stuein forsa recuperar ozildi ei il senn profetic buca mo dil Plaid de Diu, mobein è dell’existenza cristiana. Pertgei «nus» stuein dar da magliar senza quintar cons «pauns» che nus vein: ei vonza adina aunc. E quei numnein nus la grazia de Diu.
2 Re 4,42–44
Lez dis ei in um da Baal-Salisa vegnius ed ha purtau agl um da Diu vegn pauns dumiec dall’emprema raccolta e graun smaccau en siu sac. Cheu di ElisaVegn era numnaus Elischa ed ei in scolar e vegnentsuenter dad Elja: Dai quei da magliar alla glieud! Siu survient rispunda: Co sai jeu presentar quei a tschien umens? Mo el di: Dai quei da magliar alla glieud; pertgei aschia plaida il Segner: Ins vegn a magliar ed aunc schar vanzar.
Cheu ha el presentau quei ad els, ed els han magliau ed han aunc schau vanzar tenor il plaid dil Segner.
