da Marcel Köhle
La tiarza dumengia d’advent porta era il num «gaudete» che munta aschi bia sco «selegrei!». Sco in fil tgietschen va quei clom tras la lecziun da questa dumengia.
Mo tgi che legia las passaschas precedentas dil cudisch Zefanja, quel ni quella encorscha ch’il profet sedrezza allas autoritads e classas superiuras da Jerusalem cun in messadi meins legreivel. Zefanja appellescha energicamein ad els da finir cullas explotaziuns e repressiuns enviers il pievel. Cunquei muossa il profet che Dieus stat dalla vart dils paupers e quels che vivan ellas «stgiradetgnas» da lezs temps. Ual a quels less Dieus schenghegiar nova legria.
Quels plaids dil profet Zefanja (che nus udin questa dumengia) duein era encuraschar oz. Era a nus vegn ei detg: Selegrei! Nus vein in Dieus che careza nus. El ei quel che meina nus ord las differentas stgiradetgnas da nies temps. – Quei messadi less dar empau glisch el temps d’advent e quei ei segir raschun avunda da selegrar.
Zef 3,14–18
Giubilescha, feglia da Sionla feglia da Sion ei Jerusalem! Dai grius da legria, Israel! Selegra e saulta uss da tut cor, ti feglia da Jerusalem!
Scatschau ha il Segner tes adversaris, e tes inimitgs ha el bandischau.
Il Segner ei retg en tiu miez; ti stos temer nuot pli dil mal.
Gliez di vegn ins a dir a Jerusalem: Buca tema, Sion, buca lai pender la bratscha! Il Segner tiu Diu ei cheu en tiu miez. El, il pussent, vul spindrar. El mira sin tei cun grond legherment, renovescha tei cun sia carezia, intonescha sur tei in cont da letezia. Igl ei sco dil temps dalla emprema sentupada!
Jeu prendel naven da tei il di che ti has cargau zanur sin tetez.
