da ser Jan-Andrea Bernhard
Tgi che vul veser enzatgei dalla regiun, va sin ina muntogna – nus ella Foppa schessen sil Péz Fess ni sil Péz Tumpiv – e mira lunsch d’entuorn. Denton: Sche je mon silla pezza, patratgel normalmein buca grad vida purtar ina buna nuviala, mobein gaudel plitost la biala survesta…
Il profet Jesaja raquenta denton sur dad in «silla pezza» ch’annunzia la pasch, ina legreivla nova. Veramein: Sin muntognas vesan’ins buca mo pli lunsch, mobein san ins era exclamar bunas novas, lunsch entuorn.
Ella lecziun dad oz dat ei plaids consolonts che nies Segner e Salvader retuorni… Naturalmein: Sin ina muntogna ni silla pezza vesan ins meglier sia returnada…
Sco buobet vai jeu empriu ordadora, adina a caschun da Nadal: «Und wäre Christus tausendmal in Bethlehem geboren, und nicht in Dir: Du wärest doch in alle Ewigkeit verloren» (Angelus Silesius). Gie, sche nies Segner e Salvader retuorna, lu duei el vegnir en miu cor – el cor da Jerusalem ed el cor dils cartents e spitgonts. Lu savein cantar, giubilar ed engraziar a quel che porta consolaziun e cunfiert a siu pievel e liberescha nossas olmas dalla tema e dils puccaus. Ludaus seigi il Nievnaschiu!
Jes 52,7–10
Con emperneivels ein sin las muntognas
ils peis da quel che porta buna nuviala,
che annunzia la pasch,
che vegn cun nova legreivla
annunziond salvament,
che di a Sion: Retg ei tiu Diu!
Audas! Tes observaturs aulzan la vusch.
Els giubileschan tuts ensemen,
pertgei els vesan da fatscha en fatscha
il retuorn dil Segner a Sion.
Cantei, giubilei, tut vus ruinas da Jerusalem!
Pertgei il Segner porta consolaziun a siu pievel,
el liberescha Jerusalem.
