da Maria Cristina Derungs-Bartolomei
En quella lecziun setract’ei da quei che vegn numnau igl emprem viadi da missiun da Paulus ensemen cun Barnabas. Tenor las indicaziuns geograficas sespleiga l’acziun en regiuns che corrispundan alla Turchia hodierna. Ellas cloman en memoria a nus quels emprems loghens della Mar mediterrana orientala, tiaras che s’audan denter las empremas ellas qualas igl Evangeli ei vegnius perdegaus. Ei fuvan tiaras «della diaspora», nua che bia Gedius vivevan; marcaus cun lur sinagogas e culs survetschs divins dil sabat.
Lucas muossa cheu il mument decisiv dils emprems decennis suenter la mort e levada de Jesus. Paulus ensemen cun Barnabas sevolvan igl emprem als Gedius. Ei eran gie sezs Gedius e mavan ella sinagoga il sabat. Mo suenter ch’ils Gedius han refusau il messadi da Paulus, decida quel – «mess sco glisch pils pagauns» – d’annunziar igl evangeli directamein als pagauns ch’ein «selegrai ed han glorificau il plaid dil Segner». Ins fetschi stem: Els, ils pagauns, han buca ludau Paulus, il predicatur, mobein il plaid dil Segner «ch’ei sederasaus per l’entira cuntrada»; quel ei igl emprem actur, il motor, la forza ella historia dil salit tochen oz. Essan nus aunc el cass de sentir la medema legria per il plaid de Diu?
Fatgs 4,8–12
Lezs dis ein Paulus e Barnabas i da Perge vinavon ed arrivai ad Antiochia en Pisidia. Leu ein els i il sabat ella sinagoga ed han priu plaz. Suenter la radunonza ein bia Gedius e pietus proselits suandai Paulus e Barnabas. Quels plidavan cun els ed admonevan els da star fideivels alla grazia da Diu.
Il sabat sissu ei ton sco igl entir marcau seradunaus per tedlar il plaid da Diu. Vesend denton ils Gedius la fuola ein els vegni plein scuidonza, ed ei cunterschevan cun blasfemias al priedi da Paulus.
Paulus e Barnabas denton han declarau en tutta aviartadad e franchezia: A vus ha il plaid da Diu stuiu vegnir perdegaus igl emprem. Mo damai che vus rufideis el e giudicheis sesezs per buca vengonzs dalla veta perpetna, sevulvein nus ussa tier ils pagauns. Pertgei aschia ha il Segner cumandau a nus:
Jeu hai tschentau tei per glisch dils pagauns,
per che ti porties salit tochen als confins dalla tiara.
Cu ils pagauns han udiu quei ein els selegrai ed han glorificau il plaid dil Segner. E tut quels che fuvan destinai per la veta perpetna ein vegni cartents.
Ed il plaid dil Segner ei sederasaus per l’entira cuntrada. Mo ils Gedius han stigau las dunnauns noblas e da tema da Diu sco era ils emprems dil marcau. Ei han instradau ina persecuziun encunter Paulus e Barnabas e catschau els ord lur cuntrada. Quels denton han scurlau encunter els la puorla giud lur peis ed ein i ad Iconium. Ed ils giuvnals fuvan plein legria e Spert sogn.
