da sur Alfred Cavelti
Quei raquent presenta in maletg fetg amureivel da Diu. El ei buca quel che decida tut da surengiu, che vesa il mal ed il schliet ch’ils carstgauns commettan e castigia els persuenter. Biaronz eis el il Diu da misericordia. El va a Sodom per sez far in maletg dalla situaziun en quei marcau. Ils carstgauns che vivan leu, ein per Diu impurtonts. E sch’el anfla leu mo in triep da gests, lu vul el schanegiar tut ils auters.
Abraham ha quei maletg da Diu. Perquei ughegia el da contrahar cun Diu – ed el fa quei en humilitonza e cun ina ferma fidonza. El roga che Dieus preservi il pievel da Sodom e Gomorra dalla perdiziun per amur dils gests e buns che vivan leu. Ed el demuossa gronda perseveronza en sia oraziun. El va da 50 gests ano tochen giu sin 10. E Dieus teidla, va en sin quella oraziun ed exauda ella, era sch’el anfla mo paucs gests en quels marcaus.
In amureivel maletg da Diu che vegn bia ga presentaus egl Emprem Testament sco derschader e castigiader. Ed in mussament che Dieus va en sin l’oraziun ch’il carstgaun drezza ad el.
Gen 18,20–32
Lezs dis ha il Segner detg: Il plirar pervia da Sodom e GomorraQuels marcaus valevan sco loghens plein puccau. ei vegnius gronds, e lur puccau ei en verdad fetg grevs. Perquei vi jeu ir giu e mirar, sch’ei han propi fatg tenor las lamentaschuns ch’ein vegnidas tier mei ni buc. Jeu vi saver ei. Sinaquei ein ils umens seviults ed i encunter Sodom, duront che Abraham ei restaus avon il Segner. Ed Abraham va vitier e di: Vul ti propi far ir sutsu il gest ensemen cul puccont? Forsa ein tschunconta gests enteifer il marcau; vul ti propi far ir sutsu els e buca plitost perdunar al liug per amur dils tschunconta gests ch’ein leu? Dalunsch seigi quei da tei da far enzatgei aschia, da far murir il gest ensemen cun il puccont, ch’ei mondi cul gest tuttina sco cun il puccont! Quei seigi dalunsch da tei! Quel ch’ei derschader da tut il mund, duess quel buca praticar giustia?
Il Segner di: Sche jeu anflel a Sodom tschunconta gests, sche vi jeu per amur da quels perdunar a tut il marcau.
Mo Abraham tuorna a dir: Ah mira, jeu hai giu la gagliardia da plidar cun miu Segner, schegie che jeu sun mo puorla e tschendra. Forsa eis ei tschun dameins che tschunconta gests; vul ti lu far ir sutsu igl entir marcau pervia da quels tschun? El di: Sche jeu anflel leu curontatschun, sche vi jeu buca far ir sutsu el.
Ed el tuorna a dir: Forsa ein d’anflar mo curonta. El rispunda: Jeu vi per amur dils curonta buca far ei.
Abraham di: Miu Segner, buca sevilenta, sche jeu plaidel aunc ina gada; forsa ein mo trenta d’anflar leu. El di: Sche jeu anflel leu trenta, sche vi jeu buca far ei.
Abraham di: Ah, jeu hai giu la gagliardia da plidar cun miu Segner; forsa ein leu d’anflar mo vegn. El di: Jeu vi per amur dils vegn buca far ir sutsu el.
Aunc inaga di Abraham: Miu Segner, buca neu vilaus, sche jeu plaidel aunc questa ga; forsa ein leu d’anflar mo diesch. El di: Jeu vi per amur dils diesch buca far ir sutsu el.
