da ser Jan-Andrea Bernhard
Dapi miu temps d’uffonza sundel jeu adina staus perschuadius dad in Deus grazius, ed ussa legel: «Lur ovras (schliatas) vi jeu a semper mai emblidar!» – Vaiel jeu giu in maletg falliu da nies Diu? Tgei duei jeu ussa crer? Vid sia grazia, ni vid il fatg che Deus emblidi semper mai?
A casa vein nus cantau mintgaton la canzun «Vergäh’ heisst vergässa, grad so, wia’s nia wär gsii!» Enzaco ei quei stau adina ina part da mia cardientscha, denton en mia lavur sco spiritual stuevel era constatar che carstgauns san perdunar, han denton breigias dad emblidar. – Sinceramein: Vein nus adina era emblidau ina «nauschadad dil vischin» suenter ver perdunau ella ad el?
Culla vegnida da Cristus ha nies bien Deus mess autras mesiras, sia mort vid la crusch ei buca mo perdunament e giustificaziun, mobein era la basa profunda per emblidar, sco Deus fa cun nos puccaus. Gest il gi da rogaziun federala muossa a nus quei aspect fundamental: Nus lein engraziar a Niessegner e Salvader ch’el ei vegnius sil mund, nus lein rugar el per sia protecziun, denton era prender penetienzia per tut quei che nus vein tralaschau en nossa veta sco cristifideivels. Ed el, nies bien Deus, vegn a semper mai ad emblidar nies displascher vid nos agens puccaus.
Am 8,4–7
Tedlei vus tuts che supprimis ils pigns e metteis a malura ils paupers pertut ella tiara, che scheis: Cu eisi carschen, che nus saveien vender puspei nies garnezi? Cu ei il sabat vargaus, che nus saveien vender il graun? Nus lein sminuir la mesira, far pli grevs il crap da pesar e sfalsificar la stadera. Nus lein cumprar ils pigns cun daners, il pauper per dus calzers, lein vender era la paglia dil graun.
Il Segner ha engirau: Schi franc che jeu sun la splendur da Jacob! Lur ovras vi jeu a semper mai emblidar!
