da Maria Cristina Derungs-Bartolomei
Egl otgavel tschentaner a.C. flureva il reginavel dil nord (quel d’Israel, ni «Josef») da beinstonza materiala, mo tralaschava la giustia. Ins encureva mo il gudiment e celebrava in cult mo exteriur. Pussonzas jastras (Assirs) havessen en cuort spazzau quel (purtau «il sgurdin de Josef»). Cheu sesaulza en num dil Segner la vusch d’in profet, vehementa e stermentusa.
Mo agl ur de quella dira reprimanda cumpara era in fil de speronza. Quels plaids tuccan nus sco singuls e pievels privilegiai. Mislar cun il profet quels che fan biala veta e datgan buca della sort miserabla de milliardas de concarstgauns, quei ei era in’ovra de misericordia! Ella liturgia anfla quei text ina eco ella secunda lecziun, ellas admonziuns a Timoteus: «Mo ti, um da Diu, fui quei! Enquera giustia, pietad, cardientscha, carezia, pazienza…» (1 Tim 6,11–16). E tut muossa sils plaids de Lazarus e la recumandaziun da tedlar «Moses ed ils profets» (Lc 16,31).
Am 6,1a.4–7
Aschia plaida il Segner, il Tutpussent: Paupra quels ch’ein senza quitausquels che s’empatschan buc d’ina veta en sontgadad sil cuolm da Sion e quels che sesentan segirs sil cuolm da Samaria!
Vus schischeis sin letgs dad ivur, sestendeis sin loms plumatschs. Vus maglieis ils tschuts ordenter il triep ed ils vadials da nuegl. Vus cantineis cul tun dalla harpa, inventeis sco David canzuns. Vus bueis il vin ord cuppas, selaneis cugl ieli il pli exquisit. Mo il sgurdin da Josef fa a vus buca mal. Pilver, uss engira il Segner: Schi franc che jeu vivel, ordavon a tuts bandischai ston ei ir egl exil. Uss eisi finiu cun las fiastas da quels che sestendan sin lur plumatschs.
