da sur Alfred Cavelti
Gl’ei in grev schem, gie in ferm griu ch’il profet Habacuc drezza a Diu en sia pitgira. El fa experientscha da violenza, oppressiun, carplina e dispeta en siu contuorn. Tut para dad ir la fallida via e quei fa els sventireivels. La damonda fatschenta el, daco che Dieus lai tier ton dil mal e schliet el mund. El sa buca capir che Dieus lai tier tut quei ed intervegn buc per far ina fin a quella situaziun disgrazieivla. Quei exprima el en siu clom intensiv a Diu: «Daco queschas ti tier tut quei schliet che dominescha la veta?»
Ed el retscheiva in resun sin siu clom. Dieus fa curascha ad el. El duei tener la dira. Quei che ei malgest e schliet, quei ei buca da cuoz. Il gest vegni a surviver. Aschia animescha Dieus il profet da ver fidonza e restar fideivels ad el.
Hab 1,2–3; 2,2–4
Con ditg stoi jeu aunc clamar per agid, o Segner,
senza che ti fetschies stem?
Con ditg stoi jeu grir siper tei: Violenza!
senza che ti procuries salit?
Pertgei fas mirar mei sventira,
pertgei stoi jeu veser mo miseria?
Sforz e violenza ein avon mei,
carplina nescha, dispetta sesaulza.
Cheu ha il Segner rispundiu a mi e detg:
Metta per scret la visiun,
engravescha ei silla tabla,
che tut cuori per leger.
Aunc eis ei visiun, destinada per siu temps,
ella tschontscha dalla fin e di buc manzegnas.
Sch’ella s’entarda, lu spetga sin ella,
en vigur va ella, senza fallir.
Uarda, il propotent,
sia olma ha buca cuoz;
il gest denton vegn a viver
per amur da sia fideivladad.
