· 

29. dumengia ordinaria (C) – emprema lecziun

da sur Martin Bearth

Era sch’il pievel d’Israel ei mitschaus dalla sclavaria ell’Egipta fruntan ei sin lur viadi tras il desiert adina puspei sin adversaris, sco cheu ils Amalechits, nomads, rubadurs che vivian pil pli dil sblundergiar viandonts. Moses ei memia vegls per tilar el cumbat, mo el sevolva tier Diu per agid. El aulza sia bratscha ad ault, sco quei fuva usit era ell’Epigta. El ei schizun memia fleivels per tener ad ault sia bratscha, e ses cumpogns, Aron e Hur, gidan el leutier. Vein nus buca cheu in grond exempel era en nos cumbats e stempraus? Sche era nus sesentin enqualga memia staunchels e fleivels per far oraziun, anflein nus era cumpogns da viadi che uran cun nus e per nus. Moses ei in exempel; el di a nus che nus clamein buca adumbatten tier Diu.

Ex 17,8–13

Lezs dis ein ils Amalechitsin pievel pauc enconuschent che valeva sco adversari dils Israelits vegni ed han battiu cun Israel a Refidim. E Moses di a Josua: Elegia umens e tila damaun viado a batter culs Amalechits. Mo jeu vi sepustar sigl ault dil crest cul fest da Diu enta maun.

E Josua ha fatg, sco quei che Moses veva cumandau: El ei tilaus o a batter encunter ils Amalchits; mo Moses ed Aron e Hur ein i sigl ault dil crest. Ed aschi ditg che Moses teneva alzau siu bratsch, dumignava Israel: mo sch’el schava curdar siu bratsch, dumignava Amalec. E damai che la bratscha da Moses ei vegnida stauncla, han ei priu in crap e tschentau quel sut el en, ed el ei setschentaus sin quel, ed Aron e Hur sustenevan sia bratscha, in dad ina e tschel da l’autra vart. Aschia ei sia bratscha restada ferma, tochen ch’il sulegl ei ius da rendiu.

E Josua ha battiu ils Amalechits e lur armada cul fil dalla spada.

Download
Versiun per stampar
Onn current 29 C.pdf
Adobe Acrobat Dokument 82.4 KB

☛ evangeli dalla dumengia: Lc 18,1–8