dad Andri Casanova
La damonda che stat davos quellas lingias ei: Daco ha Dieus ch’ei tutpussents buc impediu quei ch’ils Egipzians han fatg cun ils Israelits? Il cudisch dalla sabientscha mira pia en quels capetels sils emprems cudischs dalla Bibla e reflectescha quels.
El propona rispostas surprendentas che sebasan sil maletg d’in Diu misericordieivel e carezont: Dieus careza tut quei ch’exista (cf. 11,24), autruisa gnanc vess el scaffiu ei. Pia, sto era ina carezia per ils Egipzians esser dada, damai che quels han apparentamein existiu.
Il cudisch dalla sabientscha vesa en quels texts ina sort pedagogia divina ch’educhescha «mo plaun a plaun» (cf. 12,2). Las diesch plagas ein stadas ina sort process per dar la caschun da seconverter – per ils Israelits sco era per ils Egipzians. Aunc oz vala: Dieus mira «buca sils puccaus dils carstgauns, per ch’els seconvertien» (cf. 11,23). Quei patratg vala ei da meditar.
Sab 11,22–12,2
Igl entir mund ei avon tei sco la puorla silla stadera,
sco il daguot rugada che croda la damaun silla tiara.
Ti fas misericordia cun tuts, perquei che ti pos tut,
ti miras buca sils puccaus dils carstgauns, per ch’els seconvertien.
Ti carezas tut quei ch’exista
e sprezzas nuot da quei che ti has fatg;
pertgei sche ti vesses odiau enzatgei,
lu vesses ti buca scaffiu ei.
Co duess enzatgei subsister, sche ti vesses buca vuliu ei?
E co duess enzatgei restar, sche ti vesses buca clamau ei?
Ti schanegias tut perquei ch’igl ei tiu,
ti, Segner, amatur dalla veta,
en tuttas caussas ei gie tiu spért nunsvaneivel.
Perquei castigias ti mo plaun a plaun quels che crodan,
ti averteschas els regurdond els vida quei ch’els han falliu,
per ch’els seconvertien dil mal
e creigien en tei, o Segner.
