da Andri Casanova
Il raquent dad Adam ed Eva el curtgin dad Eden para enconuschents a nus. L’idilla da quei liug semida entras secuntermetter allas ordras da Diu, ed Adam ed Eva ston bandunar il liug paradisic.
Sche nus legin denton il text a moda pli precisa e senza las interpretaziuns classicas e posteriuras, lu semuossa in auter maletg. Adam ed Eva secuntermettan bein al camond divin e maglian dil pumer, denton ston els buca murir, sco quei che Dieus veva smanatschau (cf. Gen 2,17). D’ina tala mort eis ei scret nuot. Anzi, els contonschan ina pli gronda enconuschientscha.
Para pia la siarp da ver giu raschun? – En in cert senn bein. Denton dat il raquent era d’entellir ch’il carstgaun duei, malgrad sia enconuschientscha, sefidar en Diu e ch’el duei buc construir ord sia atgna sabientscha ina divinitad.
Gen 2,7–9; 3,1–7
Dieus il Segner ha formau il carstgaun ord tratsch e suflau flad da veta el nas ad el; aschia ei il carstgaun daventaus in esser vivent. Lu ha Dieus il Segner plantau in curtgin ad Eden encunter damaun ed ha tschentau en quel il carstgaun ch’el veva creau. E Dieus il Segner ha schau crescher ord la tiara da tuttas sorts pumera, deletgeivla da mirar e buna da magliar; enamiez il curtgin il pumer dalla veta ed il pumer dall’enconuschientscha dil bien e dil mal.
Mo la siarp era pli maliziusa che tuts animals dalla campagna che Dieus il Segner veva scaffiu. Ed ella di alla dunna: Duess Dieus propi ver detg: Vus astgeis magliar da buc in pumer el curtgin? La dunna rispunda alla siarp: Dils fretgs dalla pumera el curtgin astgein nus magliar; mo il pumer che stat enamiez il curtgin, ha Dieus detg: Il fretg da quel astgeis vus buca magliar e gnanc tuccar en el, schiglioc stueis vus murir. Cheu replica la siarp alla dunna: Vus vegnis per franc buc a murir; mo Dieus sa bein avunda ch’en quei mument che vus maglieis da quel, vegnan vos egls aviarts e vus vegnis ad esser sco Dieus ed enconuscher, tgei ch’ei bien e tgei ch’ei mal.
Vesend ussa ch’ei fussi bien da magliar da quei pumer e che quel era in deletg da mirar e desidereivels per vegnir perderts tras el, ha la dunna priu da ses fretgs, magliau els e dau era a siu um che era cun ella, e quel ha era magliau. Ussa ein ils egls sesaviarts ad omisdus, ed els han viu ch’els eran nius, ed els han ligiau ensemen feglia da fighers e fatg scussals per els.
