da Marcel Köhle
La lecziun da questa dumengia presenta a nus l’entschatta dalla historia dad Abraham. E quella historia entscheiva cun in clom. Dieus intimescha el da bandunar sia patria e sia parentella e da far ina nova entschatta. – In detagl picant che stat buca en questa lecziun: Abraham ei da lezzas uras gia in um vegl.
Far midadas ni ughegiar enzatgei niev, cheu dat ei negina limita da vegliadetgna! Tuttina sch’ins ei giuvens ni vegls, novas entschattas e grondas midadas ella veta sa ei adina puspei dar. Mo co duein nus reagar sin quellas?
Abraham vess giu avundas stgisas (vegliadetgna, famiglia, eav.) da star a casa ed haver ina veta regulada. Mo el sefida dil plaid da Diu e semetta sin via en in futur nunenconuschent, savend che Dieus ei cheu cun sia benedicziun. – Forsa ei quei in messadi per nus: Sefar si, far ils proxims pass, ughegiar enzatgei niev e sefidar che Dieus laschi buca persuls nus.
Gen 12,1–4a
Lezs dis ha il Segner detg ad Abram:
Banduna tia patria, tia parentella e tia casa paterna e va en ina tiara che jeu vegn a mussar a ti. E da tei vi jeu far vegnir in grond pievel e vi benedir tei, e tiu num vi jeu render gronds, e ti dueis esser ina benedicziun. Quels che benedeschan tei, vi jeu benedir, e quels che smaledeschan tei, vi jeu smaledir, e tuttas schlattas dalla tiara duein esser benedidas en tei.
Cheu ei Abram sefatgs si, sco il Segner veva cumandau ad el.
