da sora Armina Maissen
«Ei il Segner en nies miez ni buc?» – Quella damonda fatschenta era ozildi biars carstgauns en vesta a nies mund, ch’ei signaus da ton pitir, entras corrupziun, violenza, egoissem e catastrofas.
Gie, jeu less dir: Il Segner ei en nies miez! El va la via dalla crusch per nus era oz, pitescha cun nus, quescha e spetga nossa libra risposta sin sia carezia. El vesa era il bien el mund. El sa che mo la carezia victorisescha. Sia egliada ch’el ha dau da lezzas uras a Pieder che ha snegau el treis gadas, dat el aunc oz a quels che snegan el, era al pli grond malfatschent, pertgei el ei vegnius el mund per spindrar tuts!
EL ei il grep e la fontauna cun aua viventa che rinforza nus, sche nus «pitgein» adina puspei sin quei grep e stein en relaziun cun EL.
Ex 17,3–7
Lezs dis veva il pievel arsira per aua. Cheu ha el puplau encunter Moses e detg: Pertgei has ti menau nus neuasi dall’Egipta per far murir nus dalla seit, nus, nos affons e nossas muntaneras?
Cheu ha Moses griu tier il Segner e detg: Tgei duei jeu pigliar a mauns cun quest pievel? Ei maunca pauc ch’els encrappan mei. Il Segner rispunda a Moses: Va ordavon al pievel e pren zacons dils vegls cun tei. Pren era il fest entamaun, cul qual ti has battiu il Nil, e va vitier il grep dil Horeb, e mira, leu vi jeu passar avon tei. Lu petga encunter il grep, sche vegn aua a sburflar neuado, ed il pievel vegn ad haver da beiber.
E Moses ha fatg aschia avon ils egls dils vegls d’Israel. Ed ins ha numnau quei liug Massa (empruament) e Meriba (engurgnientscha), perquei ch’il pievel era s’engurgnius e perquei ch’els vevan empruau il Segner cun dir: Ei il Segner en nies miez ni buc?
