da Flurina Cavegn-Tomaschett
Las tablas da crap che vegnan numnadas el text ein la secunda ediziun dallas tablas. Las empremas veva Moses destruiu en gretta, suenter che siu pievel veva viult il dies a Diu ed adurau en siu stagl il bov dad aur. Quei ei buca stau la suletta ovra da gretta. Moses trai cun ils Levits tras las retschas dil pievel e mazza 3'000 umens. Suenter quella sgarscheivla ovra roga el Diu per perdun. La lecziun entscheiva en quei liug, nua che Moses porta las novas tablas avon Diu e spera sin sia misericordia.
La lecziun lai sentir che Dieus dat adina puspei la pusseivladad per ina nova entschatta. Auter ch’ils carstgauns stat el tier sia ligia e semuossa grazius.
En quei liug anflein nus l’emprema ga il plaid hebraic JHWH per Diu, cheu translataus cun «il Segner». Il plaid JHWH munta: jeu sun quel che jeu sun (cheu). El lai vegnir nus cunscients che Dieus selai buca metter en in schema ni maletg. Gest oz, la fiasta dalla SS. Trinitad sa quei esser in bien impuls.
Ex 34,4b–6.8–9
Lezs dis ei Moses la damaun marvegl ascendius il cuolm Sinai, sco quei ch’il Segner veva cumandau ad el, ed ha priu cun el las duas tablas da crap. Cheu ei il Segner descendius el nibel e passaus vitier el. Cu Moses ha clamau il num dil Segner, ei il Segner vargaus sper sia fatscha vi ed ha clamau: Il Segner, il Segner, in Diu misericordeivel e grazius, plauns ella gretta, mo rehs da grazia e fideivladad.
E beinprest ei Moses s’enclinaus e sebess giun plaun. Ed el ha detg: Segner, sche jeu hai anflau grazia en tes egls, sche veglies ti, o Segner, tilar cun nus; pertgei quei ei in pievel stinau. Perduna a nus nossa cuolpa e nies puccau e pren nus per tia proprietad.
