da sora Armina Maissen
«Glischonta ei la sabientscha e nunsvaneivla». Gia quella declaraziun dat anim da meditar giudlunder. Nunsvaneivla ei ella. Ella ha sco Dieus sez buca entschatta e buca fin, pertgei ella vegn dad el. Ella ei plantada en la scaffiziun, en nus. Ella s’auda tier nies esser carstgaun. Ella glischa e selai anflar, ton fetg sco nus encurin la relaziun cun Diu e setenenin vidad el. En sia vischinonza sesarvan adina puspei novas portas alla sabientscha. Ella ei in muossavia, lai distinguer nus denter caussas mo mundanas e valetas perpetnas.
La sabientscha vegn nutrida dalla carezia ch’ei il ligiom denter tschiel e tiara. La sabientscha ei buca da scumbigliar ed interpretar cun savida ni intelligenza, quei che jeu constateschel magari. Ella ei divina, fa buca donn alla carstgaunadad. Savein nus denton pretender quei p. ex. dalla intelligenza artificiala che survegn pli e pli surmaun en nies mund. Ei quella propi mo per nies bien? Jeu dubetel.
Sab 6,12–16
Glischonta ei la sabientscha e nunsvaneivla;
ella selai veser da quels che carezan ella,
selai anflar da quels che enqueran ella.
Ella sedat beinspert d’enconuscher
a quels che han desideri dad ella.
Tgi che tscherca ella gia da marvegl
sto buc sestentar,
el anfla ella avon sia porta.
Meditar sur dad ella, gliez ei prudientscha perfetga,
e tgi che veglia pervia dad ella, vegn gleiti ad esser senza quitaus.
Ella va sezza entuorn per tschercar
quels ch’ein vengonzs dad ella;
ella cumpara ad els plein beinvulientscha sin via
e va ordavon ad els en tut lur patratgs.
