da sora Armina Maissen
Job, ina persuna beinstonta, cartenta, cun in viver diltut plascheivels avon Diu, ei vegnida tuccada d’ina sgarscheivla sort. Job ha piars tut, famiglia, siu entir possess e la finala aunc sia sanadad e quei en brutala miseria. Sch’ins seprofundescha intec en la historia da Job capeschan ins sias damondas, sias explicaziuns depressivas e ses cumbats, descrets en la lecziun dad oz.
Sentis denton ora che Job dat a negin la cuolpa per sia sgarscheivla sort? El enquera buca in puccont. Con spert ein ins numnadamein periclitai en tals muments da dar a zatgi la cuolpa. Eisi buc aschia? Job ei era buca serebalzaus encunter Diu, el damonda mo pertgei ch’el stoppi pitir ton malgrad sia innocenza.
Job setegn vida Diu. El confessa: «Il Segner ha dau, il Segner ha priu, il num dil Segner seigi benedius.» (Job 1,21). Siu respect e sia gronda humilitonza enviers la sabientscha divina laian buca balluccar sia ferma cardientscha en il Tutpussent. El cloma cun ina immensa fidonza e perschuasiun e quei aunc amiez sia gronda miseria: «Mo jeu, jeu sai: Miu spindrader, el viva» (Job 19,25). Quei ei la verdad che exista per el en quei mument e per adina. Ei quei buca in act exemplaric da cardientscha, che sa era dar a nus anim e forza?
Job 7,1–4.6–7
Job ha alzau sia vusch e detg:
Ei buca sin tiara cumbat la sort dil carstgaun,
e sia veta sco il viver dil mercenari?
Sco il sclav ch’enquera l’umbriva
e sco il luvrer che spetga la paga,
hai era jeu retschiert mo temps da fadigia,
e notgs da dolur ein stabilidas per mei.
Mon jeu a durmir stoi jeu patertgar:
Cu eis ei damaun, che jeu level puspei?
E cu jeu level: Con ditg tochen sera?
Sin ch’ei fa brin sun jeu unfis dil turment.
Mes dis, els sgolan pil spert ch’ina tscheffla,
spareschan senza speronza en nuot.
Patratga bein, mia veta ei sco in flad!
Miu egl sa maina veser pli ventira!
