dad Andri Casanova
Paulus drezza ses plaids en emprema lingia als fideivels da Corint. Leu vivan Gedius e Grecs. Ils Grecs numna el era pagauns. Igl ei plitost glieud ord las classas socialas inferiuras, ed a quella glieud annunzia Paulus ed ils ses il Cristus sco crucifigau e buc sco grond victur.
Cuntrari a quei ch’ils Gedius e Grecs pon tertgar, postulescha Paulus quei sco fermezia e sabientscha. Igl ei pia buc enzatgei fleivel e tup ch’il Salvader ei vegnius mess vid la crusch, anzi, quei fa part d’in midament radical che aulza ils sbassai e pigns. Quei suonda il patratg dalla semeglia cul garnetsch da senav (cf. Mt 13,31–32).
Aschia gi Paulus als fideivels da Corint ed a quels che vulan udir: Sche vus suandeis Cristus e carteis en el, veis vus tutta raschun da far quei cun perschuasiun e detschartadad, pertgei leu anfleis vus forza e sabientscha divina.
1 Cor 1,22–25
Ils Gedius garegian miraclas ed ils Grecs tschercan sabientscha. Nus denton perdeghein Cristus, il crucifigau: In scandel pils Gedius ed in’ortgadad pils pagaunsils Grecs cun lur dieus; mo a quels ch’ein clamai, ton a Gedius sco Grecs, annunziein nus Cristus sco forza da Diu e sco sabientscha da Diu.
Pertgei l’ortgadad da Diu ei pli sabia ch’ils carstgauns, e la fleivlezia da Diu ei pli ferma ch’ils carstgauns.
