dad Andri Casanova
En las brevs da sogn Gion ha la carezia ina gronda impurtonza. Aschia vegn Dieus sez numnaus la carezia (cf. 4,16). Il text ch’emprova da dar anim per la carezia descriva duas dimensiuns dalla carezia. Per l’ina la carezia enviers ils concarstgauns, ils affons da Diu, e per l’autra la carezia enviers Diu che semanifestescha egl observar ils condaments.
Cheu vegn mess interessants accents: Sche nus vesein enzatgi che carezia ils concarstgauns, lu savein nus che quel carezia Diu. Ei dat pia buc ina carezia enviers Diu senza quella carezia enviers il proxim. La rama per quella carezia ein ils condaments da Diu. Els dattan tegn e sustegn.
1 Gn 5,1–6
Scadin che crei che Jesus ei CristusIns sa era leger «il Cristus» che vul dir «igl Unschiu»., il Messias,
ei naschius da Diu.
E scadin che careza il schendrader,
careza era quel ch’ei schendraus dad el.
En quei enconuschein nus
che nus carezein ils affons da Diu,
sche nus carezein Diu
e fagein tenor ses condaments.
Pertgei la carezia viers Diu consista en quei
che nus observein ses condaments.
E ses condaments ein buca grevs.
Pertgei tut quei ch’ei naschiu da Diu
surventscha il mund.
E la victoria che ha surventschiu il mund
ei nossa cardientscha.
Tgi po surventscher il mund
deno quel che crei
che Jesus ei il Fegl da Diu?
El ei quel ch’ei vegnius
tras aua e saung, Jesus Cristus;
buca mo tras l’aua,
mobein tras aua e tras saung.
Ed il Spert ei quel che dat perdetga,
pertgei il Spert ei la verdad.
☛ 1. lecziun dalla dumengia: Fatgs 4,32–35
☛ evangeli dalla dumengia: Gn 20,19–31
