dad Andri Casanova
Paulus scriva sia secunda brev als fideivels da Corint varga 20 onns suenter la mort da Jesus Cristus. El sez ei in Gediu che ha buc enconuschiu Jesus persunalmein e che ha persequitau ils emprems cristians. Pér tras in schabetg (mistic) eis el vegnius tier Cristus e tier sia missiun. Bia da ses texts ein da capir meglier sin quei fundament.
Sco Gediu fa la «carn» cheu buc ina differenziaziun denter tgierp ed olma. La carn ei igl entir carstgaun. Mo la mort da Jesus che schischeva plirs decennis anavos, ha muntada per tut ils cristifideivels – ton cun quels che han enconuschiu e viu el sco era quels che han sulettamein udiu dad el ni che han fatg in’experientscha da conversiun sco Paulus.
Pia munta la mort da Cristus ina midada existenziala per tut quels che suondan el: Nus vivin buc mo per nusezs, mobein essan sco novs carstgauns che s’orienteschan vida Cristus. Dad el vein nus la carezia ed el animescha nus en nies dafar e carezar.
2 Cor 5,14–17
Mes cars! La carezia da Cristus tschaffa ed animescha nus, pertgei nus ponderein aschia: Sche in ei morts per tuts, lu ein consequentamein tuts morts. Ed el ei morts per tuts, sinaquei ch’ils vivents vivien buca pli per sesezs, mobein per quel ch’ei morts e levaus per els.
Perquei enconuschein nus dacheudenvi negin tenor la carn. E perfin sche nus vein antruras enconuschiu Cristus mo tenor la carn, uss enconuschein nus el buc aschia. Sch’enzatgi ei pia en Cristus, eis el ina nova creatira; il vegl ei vargau, zatgei niev ei daventau.
☛ 1. lecziun dalla dumengia: Job 38,1.8–11
☛ evangeli dalla dumengia: Mc 5,35–41
