da Marcel Köhle
L’emprema breva a quels da Tessalonic vala sco la pli veglia brev che nus enconuschin da Paulus. Ella ei vegnida scretta entuorn igl onn 50 s.Cr. Tenor ils Fatgs dils apostels (Fatgs 17,1–10) ha Paulus fundau da gliez temps, ensemen cun Silas e Timoteus, la cuminonza a Tessalonic ch’era avon ina cuminonza pagauna.
La secunda lecziun da questa dumengia ei propi il miez ed il center dall’emprema brev a quels da Tessalonic. Ella ei sco in «scharnier» che colligia l’emprema part che dat in sguard anavos sil vargau e la secunda part nua che Paulus mira sil futur dalla cuminonza. El fa quei cun buns giavischs, mo era cun plaids d’admoniziun da sustener in l’auter en carezia e da perfecziunar la veta en cardientscha.
Culla dumengia digl emprem d’advent stein nus alla sava d’in niev onn ecclesiastic, ch’ei era in «scharnier» denter il vegl e niev onn ecclesiastic. Forsa dattan quels plaids e giavischs da Paulus era a nus niev anim per nossa veta da cardientscha…
1 Tes 3,12–4,2
Il Segner vegli augmentar ed enrihir vossa carezia in per l’auter ed enviers tuts, sco era nus vein enviers vus, sinaquei che vos cors vegnien fortificai e seigien senza menda sanctificai avon
Diu nies Bab, cu nies Segner Jesus vegn ensemen cun tut ses sogns.
FrarsCheu san ins leger «Frars e soras»., vus veis empriu da nus, co vus dueis viver e plascher a Diu, e vus vivis era leusuenter.
Mo nus supplichein ed admonin vus el num dil Segner Jesus da daventar aunc pli perfetgs.
Vus saveis gie, tgei condaments che nus vein dau a vus tras il Segner Jesus.
☛ 1. lecziun dalla dumengia: Jer 33,14–16
☛ evangeli dalla dumengia: Lc 21,25–28.34–36
