da Maria Cristina Derungs-Bartolomei
Differentas fiastas ein vegnidas celebradas l’octava de Nadal. La pli veglia fuva quella della divina maternitad de Maria; naven dal 8avel tschentaner ei la fiasta vegnida dedicada alla circumcisiun (surtagliada) dil Segner; pli tard han ins quei di era festivau il Num de Jesus. Dapi 1969 festivescha il ritus roman Maria mumma de Diu; igl ambrosian (ed ils ortodoxs) aunc adina la circumcisiun, venerond en quella era igl emprem saung spons da Jesus.
La brev de sogn Paul a quels de Galazia porscha ina sintesa dils treis aspects. Jesus ei il Fegl de Diu, ed era in ver carstgaun, naschius d’ina dunna, ch’ei aschia era mumma de Diu; in pign affon gediu, che survegn siu num el mument ch’el selai suttametter allas prescripziuns della lescha e daventa aschia commember dil Pievel della Allianza.
Nus essan era adoptai sco fegls de Diu cun retscheiver il Spert dil Fegl. Quei schabegia buca senza nossa activa acceptaziun. Nus duein praticar la «surtagliada» spirituala, q.v.d. mundar nos cors dal puccau (catechissem de sogn Pius X); per dun dil Sogn Spert savein era nus participar al misteri de Maria, numnadamein retscheiver en nus e dar vinavon al mund il Vierv.
Gal 4,4–7
Cu il temps ei staus secumplenius, ha Dieus tarmess siu Fegl, naschius d’ina dunna, naschius sut la leschaTras sia mumma eis el in Gediu e
suttamess alla lescha dalla Tora dil Veder Testament., per ch’el spendri quels sut la lescha, e sinaquei che nus obtenien il dretg d’affons.
Mo damai che vus essas affons, ha Dieus tarmess en nos cors il Spert da siu Fegl che cloma: Abba, Bab.
Aschia eis ti buca pli sclav, mobein fegl; e sche ti eis fegl, lu eis ti era artavel tras Diu.
