dad Andri Casanova
La visiun che Gion presenta a nus en quella lecziun, muossa ils cartents alla fin da lur viadi. Suenter grondas tribulaziuns ein els arrivai avon il tron divin. Quei ei in maletg da speronza ed edificaziun per las cuminonzas en l’Asia minora che vegn enrihius cun maletgs da speronza ord il Veder Testament: Diu vegn ad ereger sia tenda (cf. Lev 26,11–12), ils pievels vegnan buc pli a pitir fom e seit eav. (cf. Jes 49,10), Dieus vegn a menar els allas fontaunas (cf. medemamein Jes 49,10), ed ad els vegn ei schigentau las larmas (cf. Jes 28,8).
Las speronzas dil pievel d’Israel ein era las speronzas dallas empremas cumionzas cristianas, ed ein era nossas speronzas. Nus astgein sesentir uni cun Cristus. Tras sia passiun e mort eis el arrivaus alla levada, tras nossas tribulaziuns arrivein era nus alla levada. Il tgietschen dil saung e dalla passiun fa daventar ils vestgius alvs. El grev e pesont da nossa veta, ellas dolurs e temas, gie era leu savein nus cattar fastitgs da nossa levada en Cristus.
Pal 7,9.14b–17
Jeu, Gion, hai viu ina fuola enorma che negin saveva dumbrar, ord tuttas naziuns e razzas, ord tuts pievels e lungatgs. Els stevan en vestgadira alva avon il tron ed avon il Tschut e purtavan
palmas en lur mauns.
Cheu ha in dils vegls detg a mi: Quei ein quels che vegnan ord la gronda tribulaziun; els han lavau e fatg vegnir alva lur vestgadira el saung dil Tschut. Perquei ein els avon il tron da Diu e
surveschan ad el di e notg en siu tempel; e quel che sesa sil tron vegn ad ereger sia tenda sur dad els.
Els vegnan buca pli a pitir fom e seit, e ni sulegl ni schitgira vegnan a mulestar els.
Pertgei il Tschut che stat enamiez avon il tron vegn ad esser lur pastur e menar els allas fontaunas d’aua dalla veta. E Dieus vegn a schigentar scadina larma ord lur egls.
☛ 1. lecziun dalla dumengia: Fatgs 13,14.43–52
☛ evangeli dalla dumengia: Gn 10,27–30
