da Marcel Köhle
En questa lecziun ord la brev a quels da Galazia dat sogn Paul ina egliada sin dus aspects fundamentals da nossa cardientscha: l’empermischun da Diu e l’appartenenza a Jesus Cristus.
Per igl autur ei buca la lescha la caussa decisiva, mobein la cardientscha. Tras la cardientscha s’udin nus alla famiglia da Diu e daventein aschia frars e soras en Cristus. A Paulus eis ei impurtont dad accentuar l’unitad da quella famiglia nua che las separaziuns digl origin, dalla schlatta ni dil status social duein esser surmuntadas.
Il messadi da quella lecziun ei in ferm messadi e quei en in temps nua ch’ils cunfins, las differenzas e las separaziuns vegnan adina pli fetg accentuai. La lecziun da questa dumengia fa endamen che nus tuts essan units en Cristus e sche quei gartegiass, lu fuss quei in ferm segn en nies temps dad oz.
Gal 3,26–29
Vus essas tuts affons da Diu tras la cardientscha en Jesus Cristus. Pertgei vus tuts ch’essas battegiai en Cristus, veis tratg en Cristus.
Cheu dat ei ussa ni Gediu ni Grec, ni sclav ni liber, ni um ni dunna. Vus essas gie ina unitad en Cristus Jesus.
Mo sche vus appartenis a Cristus, lu essas vus descendents d’Abraham ed artavels tenor l’empermischun.
