da Marcel Köhle
Mintg’onn ils 29 da zercladur celebrein nus duas «petgas» impurtontas dalla Baselgia primara: numnadamein ils sogns apostels Pieder e Paul. Ella Bibla vegnan els dus descrets a moda fetg differenta ed era lur agir e lur caracter ein fetg divers. Mo enzatgei che unescha e colligia els ei lur ferma cardientscha en Jesus Cristus, sco era lur promtadad dad unfrir lur veta per el.
En la secunda lecziun da quella fiasta udin nus plaids attribui a sogn Paul che resunan sco in testament spiritual. El mira anavos sin sia veta e plaida dil «bien cumbat» dalla cardientscha ch’el ha cumbattiu, sco era dalla pagaglia da giustia che vegn a spitgar el. – Malgrad ils biars prighels e persecuziuns ch’el ha fatg atras en sia veta, sesenta el, aschia la lecziun, purtaus da Diu.
Quels plaids muossan enzatgei impurtont: La forza ed igl agid han els survegniu da Diu. El ha fatg ferms els dad ir lur via. – E quella speronza lessen els era dar vinavon a nus che udin quella lecziun.
2 Tim 4,6–8.17–18
Miu car! Jeu vegnel ussa gia unfrius, ed il temps da mia partenza ei damaneivel. Jeu hai battiu il bien cumbat, hai finiu mia cuorsa e salvau la cardientscha. Ussa ei preparada per mei la cruna
dalla giustia ch’il Segner, il gest derschader, vegn a dar a mi gliez di, denton buca mo a mi, mobein a tut quels che spetgan en carezia sia vegnida.
Mo il Segner ei vegnius en agid ed ha fortificau mei, sinaquei ch’jeu sappi annunziar igl evangeli cumpleinamein e tut ils pagauns possien udir el. Aschia sun jeu vegnius sdrappaus ord bucca al
liun. Il Segner vegn a spindrar mei da tut il mal, el vegn a salvar mei e prender mei en siu reginavel celestial. Ad el seigi gloria da perpeten en perpeten. Amen.
☛ 1. lecziun dalla dumengia: Fatgs 12,1–11
☛ evangeli dalla dumengia: Mt 16,13–19
