dad Andri Casanova
Ils auturs dalla brev a quels da Colossa accentueschan el num da Paulus la muntada da sia missiun. Sia missiun sco survient digl evangeli (cf. Col 1,23) munta era pitir. Mo quei pitir ei en la glisch da Cristus buca senza senn, ni – plidau culla brev – motiv da selegrar.
In auter aspect da quella passascha ei la relaziun denter la Baselgia universala e la cuminonza locala. Paulus che survescha a quella Baselgia universala (cf. Col 1,25) ei adina puspei sedrizzaus a singulas cuminonza localas. La visiun dalla Baselgia universala daventa pér realitad, sch’ella daventa concreta el pign. Mo la cuminonza locala da Colossa – ed era las autras cuminonzas localas – drovan adina puspei l’egliada gronda. La buna nova da Cristus pertucca mintga carstgaun, l’entira carstgaunadad duei arrivar alla perfecziun en Cristus.
Col 1,24–28
Mes frarsCheu san ins leger «Mes frars e mias soras».. Jeu selegrel dallas suffrientschas che jeu supportel per vus.
En mia carn cumpleneschel jeu quei che maunca aunc vid il pitir da Cristus per siu tgierp ch’ei la Baselgia.
A quella Baselgia surveschel jeu tenor igl uffeci che Dieus ha dau a mi, sinaquei che jeu meini tier vus il plaid da Diu alla perfeziun:
Quei misteri ch’ei staus zuppaus tras tuts temps e tuttas generaziuns.
Mo ussa eis el vegnius revelaus a ses sogns. Ad els ha Dieus vuliu mussar, tgei enorma rihezia da gloria che quei misteri possedi denter ils pagauns: Quei misteri ei Cristus en vies miez, el che
lai sperar enten la glorificaziun.
Quel annunziein nus. E nus admonin mintga carstgaun ed instruin scadin en tutta sabientscha, per menar l’entira carstgaunadad alla perfecziun en Cristus.
☛ 1. lecziun dalla dumengia: Gen 18,1–10a
☛ evangeli dalla dumengia: Lc 10,38–42
