dad Andri Casanova
La brev als Hebrès presenta in cuntrast denter dus cuolms. Dad ina vart il Sinai, era sche quel vegn buc numnaus per num, e da l’autra vart il Sion. Il Sinai vegn presentaus malamein e terrester, il Sion ei il cuolm celestial ed empermischun divina.
Cun quels maletgs duein ils adressats vegni svegliai. Els ein sedecidi per Cristus, il Fegl da Diu. Lur mira e lur plascher ei il Sion en tschiel. Quei cuntrast tier il Sinai capeta denton empau sin donn e cuost dil raquent dil Veder Testament (mira 2 Mos 19).
La ligia al Sinai ha giu Moses per mediatur, ella tegn il sogn e divin dapersei, ella stema quel. Il mediatur dalla nova ligia ei Jesus che ha purtau il sogn e divin en nies miez. Quella ligia unescha ina cuminonza festiva. Duas ligias cun mintgamai lur atgnas valurs. Impurtont ei che nus sescheien animar da quellas.
Heb 12,18–19.22–24a
Mes frarsCheu san ins leger «Mes frars e mias soras».! Vus essas buca s’approximai al cuolm (Sinai)Ins sa desister da numnar «Sinai». ch’ins sa palpar, vus essas buca savischinai a flommas da fiug, a fugatscha, stgiradetgna e stemprau,
al fracass da trumbetta ed al resun dils plaids che fuva aschi ferms e penetronts, ch’ils auditurs han supplicau, quella vusch dueigi buca pli discuorer cun els.
Vus essas denton s’approximai al cuolm Sion, al marcau dil Diu vivent, al Jerusalem celestial, a mellis e mellis d’aunghels, alla raspada festiva, alla cuminonza dils empremnaschi ch’ein enscrets
en tschiel.
Vus essas savischinai a Diu, il derschader universal, als spérts dils gests che han gia contonschiu la perfecziun, ed a Jesus, il mediatur dalla nova ligia.
☛ 1. lecziun dalla dumengia: Sir 3,17–18.20.28–29
☛ evangeli dalla dumengia: Lc 14,1.7–14
