dad Andri Casanova
Paulus ha scret ina cuorta brev a Filemon ed el supplichescha denter auter da puspei prender si il sclav Onesimus. Quei para atgnamein dad esser pauc spectacular, denton metta Paulus cheu accents quasi revoluziunars.
Onesimus ei probabel fugius da siu patrun Filemon. Quei fuva da gliez temps in delict. El ha lu empriu d’enconuscher Paulus en perschun ed ei daventaus in cristifideivel. Cun la perschuasiun che tut ils carstgauns seigien eguals avon Jesus Cristus, entscheiva Paulus cheu a surmuntar las categorias da sclav e buc sclav.
Paulus pretenda da Filemon da prender si Onesimus sco carezau frar. Quei vegn ad esser stau ina sfida per Filemon, perquei s’exprima Paulus era fetg emoziunal e rugond. Mo el sforza era buca Filemon tier quei pass, anzi, Filemon duei fa el ord atgna perschuasiun cristiana.
Filemon 9b–10.12–17
Miu car! Jeu, Paulus, in um vegl ed ussa aunc en perschun per amur da Cristus Jesus, jeu roghel tei en favur da miu affon Onesimusei da leger cugl
accent sigl «e», pia Onẹsimus, che jeu hai fatg renescher en mias cadeinas.
Quel tarmettel jeu anavos a ti, el che munta ton sco miu agen cor.
Bugen vess jeu salvau el cheu tier mei, sinaquei ch’el surveschi a mi en tiu stagl, aschiditg che jeu portel las cadeinas pigl evangeli.
Mo senza tiu cunsentiment hai jeu buca vuliu prender ina decisiun, per che tiu benefeci seigi buca sfurzaus, mobein daventi da libra voluntad.
Forsa eis el vegnius separaus da tei per in cuort temps, sinaquei ch’el vegni restituius a ti per adina, denton buca pli sco sclav, anzi, per bia dapli ch’in sclav; sco in carezau frar.
Per mei eis el gia in frar, con dapli lu per tei, ton tenor la carn sco el Segner.
Sche ti quentas propi mei per tiu amitg, lu pren si el sco da retscheiver mei!
☛ 1. lecziun dalla dumengia: Sab 9,13–18b
☛ evangeli dalla dumengia: Lc 14,25–33
