da Flurina Cavegn-Tomaschett
La lecziun dad oz vegn numnada «himni da Filippi» ed ei pia ina canzun da laud a Cristus. Il himni s’avischina entras in lungatg precis e bufatg al misteri da Cristus: Cristus era diltut Diu e diltut carstgaun. Sco carstgaun eis el staus sclav e fumegl. Il scalem denter il divin ed il human savess buc esser pli gronds.
Quei moviment a bass, dil celestial al terrester, dil divin al human, finescha ella crusch. La crusch sco punct bass porta el medem mument era la midada. Entras ella vegn Jesus Cristus puspei alzaus.
Il num che Dieus dat ad el exprima: Jesus Cristus ei il Signur ed entras el vegn era il Bab glorificaus.
Fil 2,6–11
Schegie che Cristus Jesus fuva ella veta da Diu, ha el buca priu ei sco ina preda dad esser aduals a Diu. El ha biaronz spogliau sesez, ha acceptau la veta da sclav ed ei daventaus il medem sco
ils carstgauns.
Ed en sia cumparsa han ins priu el per in carstgaun. El ei sehumiliaus e daventaus obedeivels entochen la mort, entochen la mort vid la crusch. Perquei ha Dieus alzau el sil pli ault scalem e dau
ad el il num che stat sur tut ils nums, sinaquei che mintga schanugl sestorschi el num da Jesus en tschiel, sin tiara e sut la tiara, e che mintga lieunga confessi: Il SignurEl grec ha ei num «kyrios», pia il Segner. Cheutras vegn fatg allusiun a siu esser divin. ei Jesus Cristus, per gloria da Diu, il Bab.
☛ 1. lecziun dalla dumengia: Num 21,4-9
☛ evangeli dalla dumengia: Gn 3,13–17
