da sora Armina Maissen
La meditaziun davart quella lecziun entscheivel jeu cun ils patratgs finals dalla meditaziun dalla dumengia vargada: «Nus vesein: Nies esser cristifideivels consista en ademplir schi bein sco pusseivel nies pensum cun fidonza sigl agid da Diu».
Gie, ei drova perseveronza, in star vidlunder. Sco ils apostels ein buca memia loschs da rugar ses fideivels per l’oraziun per els sezs, senuspeschan els era buc da numnar lur buna lavur, fatga cun gronda premura e quei gratuitamein, senza susteniment. Tut ha siu liug e siu dretg. En quella sinceradad schai in admonir cun beinvuglientscha. Els numnan il fatg sco el ei, e siu exempel confirmescha lur dretg d’admonir.
Jeu less metter quels patratgs buca mo en connex cul temps dils apostels, na buca meins era en nies temps.
2 Tes 3,7–12
Mes frars Cheu san ins leger «Mes frars e mias soras». ! Vus saveis, co ins duei imitar nies exempel. Nus essan buca stai lischents
en vossa cuminonza. Tier negin vein nus magliau nies paun gratuitamein, anzi, di e notg vein nus luvrau cun stenta e premura, per gie buca dar mulesta ad enzatgi da vus.
Buca che nus vessen forsa buca giu il dretg da pretender susteniment!
Nus vein denton vuliu dar a vus in exempel, per che vus saveies suandar nus. Pertgei cu nus eran leu tier vus, vein nus perdegau a vus la devisa: Tgi che vul buca luvrar, duei era buca
magliar!
Nus vein numnadamein enderschiu, ch’entgins da vus meinien ina veta lischada, lavurien nuot e fetschien mo caussas malnizeivlas.
Quels tals lessen nus admonir, e nus cumandein ad els el num dil Segner Jesus Cristus da far en tutta calma lur lavur per aschia saver magliar lur agen paun.
