da sur Marcus Flury
Normalmein entscheveva a sias uras ina brev a moda fetg cuorta. Ei tunava forsa aschia: Paulus als frars ed allas soras a Roma – salid. Mo sogn Paul vul gest all’entschatta da sia brev als Romans dir tut. El vul palesar siu entir evangeli da Jesus Cristus ch’ei descendent da David, ch’ei Fegl da Diu, ch’ei levaus dils morts, ch’ei il Signur. En el ein tuttas empermischuns dils profet secumplenidas. Quella lecziun dalla quarta dumengia d’Advent muossa a nus tgi che quei affon ei che nus astgein spitgar da Nadal, nus ch’essan ils carezai da Diu e clamai da Jesus Cristus.
Ro 1,1–7
Paulus, survient da Cristus Jesus, clamaus sco apiestel, destinaus per annunziar igl evangeli da Diu ch’el ha predetg entras ses profets en las sontgas Scartiras.
Quei evangeli pertucca siu Fegl ch’ei tenor la carn descendent ord la lingia da David, mo ch’ei tenor il spÈrt da sontgadad, entras la levada dils morts tschentaus per Fegl da Diu cun pussonza:
Jesus Cristus, nies Signur.
Entras el vein nus retschiert la grazia ed igl apostolat per perdegar en honur da siu num igl obedir en cardientscha denter tuts pagauns.
Denter quels s’udis era vus ch’essas clamai da Jesus Cristus. A tut ils zun carezai da Diu a Roma clamai d’esser sogns: Grazia a vus e pasch da Diu nies Bab e dil Segner Jesus Cristus!
