da sora Armina Maissen
In grondius giavisch – «grazia e pasch da Diu nies bab e dil Segner Jesus Cristus» e quei giavisch han Paulus e Sostenes alla cuminonza da Corint ch’ei confidada ad els. Els vulan che ses confidai sentien sco els, pertgei tuts ein sco els frars e soras en Cristus.
Grazia e pasch ei in schenghetg da Diu per tut quels ch’enqueran sia vischinonza. Quei vulan Paulus e Sostenes far clar entras l’atgna experientscha. Els sentan che mo la relaziun cun Diu schenghegia pasch interna en tuttas situaziuns e fa habels els d’annunziar igl evangeli da Cristus en tutta perseveronza. Gie, sulet il contact, la relaziun cun Jesus Cristus dat era a nus – soras e frars en Cristus oz – senn e forza en tuts schabetgs, bials e trests el mintgadi.
1 Cor 1,1–3
Paulus, clamaus sco apiestel da Jesus Cristus tras la voluntad da Diu, ed il frar Sostenes, alla baselgia da Diu ch’ei a Corint, a quels ch’ein sanctificai en Cristus Jesus, clamai d’esser sogns
cun tut quels ch’invocheschan il num da Jesus Cristus, nies Signur, en mintga liug, ton tier els sco tier nus.
Grazia a vus e pasch da Diu nies Bab e dil Segner Jesus Cristus.
