da Flurina Cavegn-Tomaschett
Igl apiestel Paulus scriva a siu collaboratur Timoteus. Ei setracta dad ina situaziun da grevezia e Paulus sesprova da rinforzar Timoteus. El animescha da setener fermamein vid igl evangeli, era sch’ei dat resistenza. Ei va per l’experientscha dil pitir, buc sco ina crusch senza senn, mobein sco part dalla via cun Cristus. Paulus regorda che Dieus cloma buc nus pervia da nossas prestaziuns, mobein perquei ch’el manegia bein cun nus. Sia beinvuglientscha ei in regal che porta nus tras la veta. En Jesus Cristus ei questa vischinonza da Diu daventada veseivla e palpabla. Il text envida nus da buca metter nossa confidonza en nus sezs, mobein en Diu.
2 Tim 1,8b–10
Miu car! Supporta cun mei las tribulaziuns pigl evangeli tras la forza da Diu!
El ha spindrau e clamau nus tras ina sontga clamada, buca muort nossas ovras, mobein tenor sia atgna voluntad e tras la grazia ch’ei dada a nus da perpeten enneu en Cristus Jesus; mo uss eis ella
cumparida tras la vegnida da nies Salvader Jesus Cristus.
El ha destruiu la mort e fatg resplender la veta ed immortalitad tras igl evangeli.
