da ser Jan-Andrea Bernhard
«Mes cars!» – Aschia entscheivan ils plaids sur dil «crap vivent», il «crap eligiu» …, levaus da Pastgas. La veta quotidiana ei denton puspei returnada dapi la fiasta da Pastgas. La gronda legria ceda als quitaus dil mintgagi.
Igl ei sco ella veta: Ils gis cuoran ed ins emblida quei e tschei, biaras obligaziuns laian mintgaton schizun dalla vart il «crap». Ed ussa? Essan nus gia ils nuncartents? Gia in’enzenna ch’il crap ei daventaus tier nus in «crap da scarpetsch»?
Las davosas jamnas vaiel puspei astgau sentir ch’il Segner, nies crap da salit, vul buca che nus mondien alla malura, mobein survegnin la veta perpetna (Gn 3,16).
Pertgei: Gest il scribent da quella brev fa amogna a nus, a «ses cars», che nus sco cristians, sco «pucconts e gests» (Martin Luther), s’audien tier la schlatteina eligida e che nus dueigien cuntinuar dad annunziar las grondas ovras da Diu!
1 Pd 2,4–9
Mes cars! Vegni tier el, il crap vivent ch’ei bein sbittaus dils carstgauns, mo eligius e prezius avon Diu!
Sco crappa viventa stueis era vusezs seschar baghegiar en in edifeci spiritual, en in sogn sacerdozi, per purtar unfrendas spiritualas ch’ein plascheivlas a Diu tras Jesus Cristus. Pertgei ei
sedi en la Scartira:
Mira, jeu tschentel a Sion in crap da cantun,
in crap eligiu e custeivel,
e quel che crei enten el,
vegn buc a vegnir en zanur.
A vus che carteis s’auda quella honur!
Mo per ils nuncartents ei quei crap ch’ils construiders han rufidau daventaus il crap da cantun, in crap da scarpetsch ed in grep dalla tentaziun.
Els sescarpetschan, perquei ch’els obedeschan buc al plaid; mo aschia fuva ei stau destinau per els.
