da Maria Cristina Derungs-Bartolomei
Cun quels plaids finescha la brev de sogn Paul. Denter las usitadas exortaziuns conclusivas sesanfla era ina de gronda peisa: Daventei perfetgs. In entir program de veta!
La lecziun ei vegnida tscharnida a caschun della davosa expressiun, ella quala vegn numnada la Sontgissima Trinitad en sia treidubla moda de communicar grazia e veta. Quella formulaziun de benedicziun cumpara negliu auter ellas brevs de sogn Paul; forsa fuva quella ina fuormla liturgica.
Ei croda en egl ch’ei vegn cheu menziunau il «sogn betsch» (sco era en Ro 16,16; 1 Cor 16,20; 1 Tes 5,26; 1 Pd 5,14 – ella varianta «betsch della carezia»). Bitschar era lu e leu ina moda usitada per salidar tierparents e amitgs. Ins patratgi al betsch de Judas a Jesus! (Lc 22,47–48). Suttastrihau vegn ch’il betsch duei esser «sogns», q. v. d. expressiun transparenta della carezia che Dieus ha communicau.
Ella tradiziun liturgica daventa quei il «betsch della pasch». Egl Orient ei quel semantenius; en auters loghens eis el vegnius substituius cun fuormas stilisadas de embratschada (p. ex. denter ils celebrants agl altar), ni cun dar u il maun ni in auter «signal» da lunsch eav. Sia significaziun ei igl esser perina dils cartents e il renconuscher in l’auter sco membra de Cristus.
2 Cor 13,11–13
Mes cars, selegrei, daventei perfetgs, seschei admonir, seigies perina, vivi en pasch, ed il Diu dalla carezia e dalla pasch vegn ad esser cun vus.
Salidei in l’auter cul sogn betsch. Tut ils sogns salidan vus.
La grazia dil Segner Jesus Cristus e la carezia da Diu e la cuminonza dil Spert sogn seigi cun vus tuts!
☛ 1. lecziun dalla dumengia: Ex 34,4b–6.8–9
☛ evangeli dalla dumengia: Gn 3,16–18
