dad Andri Casanova
Il far puccau ed il puccau sez ei da vegl enneu vegniu reflectau els texts biblics. Cun il raquent dad Adam ed Eva en Gen 3 vegn illustrau la consequenza dil puccau. En mintga cass sepresenta il puccau sco experientscha dad ina e scadin, entschiet tier Adam e tut ils vegnentssuenter.
Il puccau era el mund avon ch’ei detti la lescha, la Tora, ch’ei in agid da sedistaccar dil mal. El e la mort pertuccavan tuts e tuttas. Ed era cun la Tora eran il puccau e la morta buc naven. Adam ei aschia ina figura e semeglia per l’entira carstgaunadad.
Da medema resp. aunc pli gronda dimensiun ei l’ovra da Cristus. Perquei cumpareglia Paulus insumma Adam e Cristus. La grazia da Diu ch’ei regalada en Cristus survarga quei. Ella ei buca mort, mobein veta. E quei ei buca sulettamein ina speronza per la fin dils temps, mobein enzatgei che daventa gia uss realitad.
Ro 5,12–15
Mes cars! Cul puccau stat ei aschia: Tras in sulet carstgaun ei il puccau entraus en quest mund, e tras il puccau la mort, ed aschia ei la mort ida vi sin tuts carstgauns, perquei che tuts han
fatg puccau. Puccau ha ei gia dau el mund era avon la lescha; il puccau vegn denton buca quintaus, sche la lescha nun exista. E tonaton ha la mort regiu dad Adam tochen Moses era sur da quels che
vevan buca fatg puccau cun in surpassament semegliont a quel d’Adam ch’ei il tip e la semeglia da quel che dueva vegnir.
Buca ch’ei seigi culla curdada gest sco cul survegnir la grazia! Pertgei sche tuts ein morts muort la curdada dad in sulet, tonpli ein la grazia da Diu ed il dun obtenius tras l’ovra da grazia da
quei sulet carstgaun Jesus Cristus stai surabundonts per tuts.
☛ 1. lecziun dalla dumengia: Jer 20,10–13
☛ evangeli dalla dumengia: Mt 10,26–33
