dad Andri Casanova
Ella correspondenza cun la cuminonza da Roma sefatschenta Paulus cun la muntada dil batten. Tgei munta ei d’esser battegiaus? Sia risposta ei radicala: Tgi ch’ei battegiaus en Cristus Jesus, ei colligiaus entratgamein cun lez, ina colligiaziun sur veta e mort. La colligiaziun ha vigur sur la mort ora.
Cun quella teologia rispunda Paulus la finala ina damonda pertuccont il puccau. La mort da Cristus Jesus ha surventschiu la pussonza dalla mort e sia levada dad a nus ina nova perspectiva, numnadamein da schar dalla vart il puccau. Secapescha ei quei ina sfida da sedistanziar en tuts graus dil puccau, denton – e gliez ei medemamein central ellas ponderaziuns da Paulus – en nus ei plantau ina forza immensa che surmunta tut puccau, la forza dalla veta a Diu.
Ro 6,3–4.8–11
Mes cars! Saveis vus buca che nus tuts, ch’essan battegiai en Cristus Jesus, essan battegiai en sia mort? Tras il batten essan nus pia vegni satrai cun el en la mort, sinaquei che era nus
viandeien en ina veta nova, sco Cristus ei levaus dils morts tras la gloria dil Bab.
Sche nus essan denton morts cun Cristus, cartein nus che nus vegnien era a viver ensemen cun el.
Nus savein gie che Cristus, inaga leventaus dils morts, miera buca pli e che la mort ha buca pli pussonza sur dad el.
Quei che pertucca sia mort, eis el morts al puccau inaga per adina; mo quei che pertucca sia veta, viva el a Diu.
Aschia considerei era vusezzi sco morts al puccau, mo sco vivs a Diu enten Cristus Jesus.
☛ 1. lecziun dalla dumengia: 2 Re 4,8–11.14–16a
☛ evangeli dalla dumengia: Mt 10,37–42
