dad Andri Casanova
Paulus fa bugen diever da cuntrasts per exprimer sias ponderaziuns teologicas. Quei ei pil pli fetg illustrativ. Quella gada presenta el enviers la cuminonza a Roma la carn ed il spért sco cuntrasts. Sch’el tschontscha cheu dalla carn manegia el il carstgaun ch’ein inclinaus al mal ed a schliats gargiaments. Il spért perencunter ein ina forza che survarga il human, ina forza che vegn da Diu, il Spert.
Sco cristifideivels ei quella forza divina dada a nus. E la differenza da ver ni da buca ver quella forza numna Paulus aschi gronda ch’el gi che la carn munti mort ed il Spert veta. Pia puspei in cuntrast. Paulus vul far curascha: Nus vein retschiert in’immensa forza che lai viver nus auter. Ei vala d’acceptar quella forza e viver tenor quella en tuts graus, lu survegn ella ina fatscha reala.
Ro 8,9.11–13
Mes cars! Vus essas buca ragischai ella carn, mobein el spért, damai ch’il Spert da Diu avda en vus. Mo tgi che ha buca il spért da Cristus, quel ei buca ses. Denton sch’il Spert da quel che ha
leventau Jesus dils morts avda en vus, lu vegn quel che ha leventau Cristus Jesus dils morts a vivificar era vos corps mortals tras siu Spert che avda en vus.
Mes frars Cheu san ins leger «Mes frars e mias soras». , nus essan pia buca debiturs dalla carn per stuer viver tenor la carn.
Pertgei sche vus vivis tenor la carn, stueis vus murir. Mo sche vus mortificheis las ovras dil tgierp tras il Spert, vegnis vus a viver.
