da Flurina Cavegn-Tomaschett
Ella brev alla cuminonza cristiana a Roma resumescha Paulus aunc ina gada quei che dat funs a sia cardientscha. El drezza l’egliada sin igl agir da Diu enviers il carstgaun: Tut entscheiva cun siu clom beinvulent e tut anfla en el sia finamira. En paucas construcziuns tschenta Paulus in vast artg che lai veser la voluntad da Diu che survescha als carstgauns. Ils plaids dil scribent ein signai dalla gronda fidonza en la carezia da Diu.
Ro 8,28–30
Mes cars! Nus savein che tut survescha al bien per quels che carezan Diu, per quels ch’ein clamai tenor siu destin.
Pertgei quels ch’el ha enconuschiu ordavon, ha el era predestinau da daventar cunforms alla semeglia da siu Fegl, sinaquei ch’el seigi igl empremnaschiu denter biars frars
Cheu san ins leger «denter biars frars e soras»..
E quels ch’el ha predestinau, ha el era clamau; quels ch’el ha clamau, ha el era giustificau; e quels ch’el ha giustificau, lezs ha el era glorificau.
☛ 1. lecziun dalla dumengia: 1 Re 3,5.7–12
☛ evangeli dalla dumengia: Mt 13,44–52
