Nadal 2020

Ella Bibla anflein nus zun pauc davart la naschien­tscha ed affonza da Jesus. Interes­sant ei oravon­tut ch’ils quater evange­lis porschan quater differen­tas perspecti­vas sill’en­tschat­ta dalla veta terre­stra da Jesus. Damai che quellas quater perspecti­vas vegnan annunzia­das ellas litur­gias dils gis da Nadal, vala ei la peina dar ina pintga survesta. Forsa eis ei schizun ina caschun dad inaga leger quellas quater entschattas.

Il pli vegl evangeli ch’ei vegnius nudaus entuorn ils onns 70 suenter Cristus, entscheiva culs plaids: «Entschatta dalla buna nova da Jesus Cristus, Fegl da Diu» (Mc 1,1). Lu suonda in cuort raquent davart Gion Battesta che annunzia la vegnida da Jesus e battegia Jesus el Jordan. Jesus ha lu entuorn 30 onns. Igl evangeli tenor Marcus exprima pia gnanc ina silba davart la naschientscha, affonza e giuventetgna da Jesus. Igl origin da Jesus cumprimescha el sulettamein en las expressiuns «Cristus» e «Fegl da Diu».

☛ L’entschatta digl evangeli tenor Marcus ei vegnida annunziada la 2. dumengia d’advent (Mc 1,1–8) e vegn repetida la fiasta dil batten da Jesus (Mc 1,6b–11).

Era igl evangeli tenor Gion entscheiva cun la veta da Jesus sco carschiu. Plinavon tschenta el ordavon in text tut special, ina sort poesia e meditaziun sur digl esser da Jesus Cristus. Leu numna el igl eveniment da Nadal a moda abstracta, denton fetg profunda: «Ed il Vierv ei daventaus carn ed ha avdau en nies miez» (Gn 1,14a).

☛ Il schinumnau prolog digl evangeli tenor Gion vegn annunziaus il di da Nadal, pia ils 25 da december (Gn 1,1–18).

Ils raquens da Nadal ein d’anflar els evangelis tenor Mattiu e Lucas. Lur raquens ein buca meins profunds, anzi, ils evangelis mettan lur agens accents ed han in clar messadi.

Igl evangeli tenor Mattiu entscheiva cun la genealogia da Jesus. Ella ei fetg detagliada, denton da capir a moda simbolica. La veta e las ovras da Jesus ein numnadamein da capir en stretg connex cun il pievel d’Israel e sia historia cun Diu. Perquei illustrescha igl evangeli tenor Mattiu era la fuigia ell’Egipta, analog alla fugia da Josef el Veder Testament.

☛ La genealogia e naschientscha da Jesus ei previda per la vigelgia da Nadal (Mt 1,1–25), pil pli vegn denton priu la lecziun dalla notg ord igl evangeli tenor Lucas. La viseta dils sabis vegn annunziada la fiasta da Buania (Mt 2,1–12 [1], [2]).

La finala cuntegn igl evangeli tenor Lucas la pli enconuschenta versiun dalla naschientscha da Jesus. Quest evangeli dat speciala peisa als paupers e squitschai, e perquei ein ils sempels pasturs quels ch’astgan sco emprems veser il nievnaschiu. Entuorn quei raquent da Nadal porscha igl evangeli tenor Lucas ulteriurs raquens dall’affonza da Jesus per illustrar tgi ch’ei naschius cheu sin tiara.

☛ Il raquent da Nadal tenor Lucas vegn annunziaus da Nadal notg (Lc 2,1–14 [1], [2]). La presentaziun da Jesus el tempel ei previda per la fiasta dalla sontga famiglia (Lc 2,22–40).